Kolhapur News : इथेनॅालच्या उत्पादनवाढीसाठी केंद्राने गोड ज्वारीची (स्वीट सोरघम) लागवड वाढविण्यासाठी प्रयत्न सुरू केले आहेत. राष्ट्रीय साखर संस्थेने यासाठी पुढाकार घेतला आहे. बलरामपूर साखर कारखाना आणि दालमिया भारत शुगर लिमिटेडच्या सहयोगाने गोड ज्वारी आंतरपीक म्हणून घेता येईल का, याबाबत चाचण्या करण्यात येत आहेत.

ऊस लागवड करताना उसाच्या दोन सरींमध्ये ज्वारी घेण्याबाबत चाचपण्या सुरू आहेत. उत्तर प्रदेशातील शाहजहापूर व गोंडा या जिल्ह्यांत हे प्रयोग केले जात आहेत. ऊस व गोड ज्वारीच्या एकत्रित शेतीतून ऊस उत्पादकाला चांगला नफा मिळू शकेल, असा आशावाद केंद्र सरकारला आहे. हा उद्देश पुढे ठेवून हे पथदर्शी प्रयोग केले जात आहेत.

गोड ज्वारीच्या सीएसएच २२, एसएसएसएस ७४, एसएस ८४, फुले वसुंधरा, आयसीएसएसएच २८ या वाणांची चाचपणी इंडियन, इन्सीट्यूट ऑफ मिलेट्स रिसर्च हैदराबाद यांच्यातर्फे करण्यात आली होती.

या परीक्षणातून या ज्वारीची सरासरी उत्पादन ५० ते ५५ टन प्रतिहेक्टर, तर इथेनॅालचे उत्पादन ४५ ते ५० लिटर प्रतिटन होऊ शकते, असा निष्कर्ष काढण्यात आला होता.

दुहेरी पिकामुळे शेतकऱ्याला तर फायदा होईलच पण इथेनॅाल तयार करणारे कारखाने ही ज्वारीही शेतकऱ्यांकडून घेतील. याचा फायदा कारखाने व ऊस उत्पादक दोघांनाही होऊ शकेल.

काय आहे गोड ज्वारी?

गोड ज्वारी ही आपल्या नेहमीच्या खरीप ज्वारीसारखीच असते. मात्र जास्त कायिक वाढ आणि तिच्या ताटाच्या रसामध्ये अधिक साखरेचे प्रमाण (ब्रिक्‍स) असल्याने त्यास गोड ज्वारी म्हणतात. या ज्वारीच्या ताटामध्ये उसासारखी गोडी असते. त्याच्या रसापासून काकवी किंवा गूळ आणि इथेनॉल बनविता येते.

गोड ज्वारीच्या ताटापासून रस काढल्यानंतर राहिलेला चोथा गुरांना चारा म्हणून वापरता येतो. या ज्वारीची लागवड ५५० ते ७५० मिमी वार्षिक पाऊसमानाच्या ठिकाणी करता येऊ शकते. सध्या ही ज्वारी मध्य व दक्षिण भारत, उत्तर प्रदेश व उत्तरांचल आदी ठिकाणी चांगली येऊ शकते.