Nagpur News : केंद्र शासनाने सोयाबीनला ४८९२ रुपयांचा हमीभाव जाहीर केला असतानाच बाजारात मात्र सोयाबीन ३२०० ते ४२०० रुपये दराने विकले जात आहे. बाजारात सध्या नवीन सोयाबीनची आवक होत असून त्यात ओलावा १८ टक्क्यांपेक्षा अधिक असल्याने हे दर मिळत असल्याचा दावा केला जात आहे.

बाजारात सोयाबीन ३२०० ते ४००० रुपयांनी विकले जात असल्याच्या परिणामी केंद्र सरकारने खाद्य तेलावरील आयात शुल्कात वाढ केली. त्याच्या परिणामी सोयाबीनचे दर तेजीत येतील, अशी अपेक्षा होती. परंतु सोयाबीन दराऐवजी खाद्यतेलाच्या दरात वाढ झाली.

त्यामुळे आता सोया पेंडच्या दरात वाढीसाठी निर्यात अनुदान देण्यात यावे, अशी मागणी जोर धरू लागली आहे. सोया पेंडचा वापर पोल्ट्री फिडमध्ये होते. सोया पेंडला निर्यात अनुदान दिल्यास निर्यात वाढेल. मात्र त्याचा विपरित परिणाम पोल्ट्री फिडच्या दरावर होणार असल्याची भीती पोल्ट्री उद्योगातून व्यक्‍त केली जात आहे.

ही सारी स्थिती असताना सोयाबीनचे दर मात्र वाढत नसल्याने शेतकऱ्यांमध्ये मात्र अस्वस्थता आहे. एकट्या अमरावती बाजार समितीत रोज सरासरी २० हजार क्‍विंटलपेक्षा अधिक सोयाबीनची आवक होत आहे. परंतु या शेतीमालात ओलाव्याचे प्रमाण १८ टक्क्यांपेक्षा अधिक असल्याचे सांगत ३८०० ते ४२०० रुपये अशा दराने सोयाबीन खरेदी केले जात आहे.

मध्य प्रदेशात दर ३००० रुपयांवर

ओलाव्याचे कारण देत सोयाबीनचे देशातील पहिल्या क्रमांकाचे उत्पादक राज्य असलेल्या मध्य प्रदेशात अवघ्या ३००० ते ४६३० रुपये दराने सोयाबीनचे व्यवहार होत आहेत. विदिशा (मध्य प्रदेश) बाजार समितीत एक हजार शेतकऱ्यांच्या माध्यमातून दररोज सरासरी ११ हजार क्‍विंटल सोयाबीनची आवक होत आहे.