Sangli News : दिवाळीच्या सुट्टीनंतर बाजारपेठेत बेदाण्याची आवक हळू हळू वाढू लागली आहे. उठावही वाढू लागला आहे. दर्जेदार बेदाण्याला प्रति किलोस १२० ते २०० रुपये असा दर मिळत आहे. बेदाण्याचे दर टिकून आहेत. येत्या काळात बेदाण्याच्या दरात वाढ होण्याची शक्यता बेदाणा उद्योगातील जाणकारांनी व्यक्त केली आहे.

सांगली जिल्ह्यातील तासगाव, सांगली आणि सोलापूर जिल्ह्यातील पंढरपूर या तिन्ही बाजार समितीत दिवाळीसुट्टीनंतर बेदाण्याचे सौदे सुरु झाले आहेत. या तीनही बाजारात ५ ते ६ हजार टन बेदाण्याची आवक होत आहे. त्यापैकी ५० ते ६० टक्के बेदाण्याची विक्री होत आहे. दिवाळीपूर्वी दर्जेदार बेदाण्याला प्रति किलोस १२० ते २०० रुपये असा दर होता.

सुट्टीनंतर सौदे सुरू झाले त्यावेळी बेदाण्याची आवक थोडी मंदावली होती. परंतु त्यानंतर बेदाण्याची आवक वाढू लागली आहे. त्यामुळे व्यापाऱ्यांकडून दर्जेदार बेदाण्याला चांगला दर मिळत आहे. सध्या दर्जेदार बेदाण्याला प्रति किलोस १२० ते २०० रुपये असा दर मिळत आहे. बेदाण्याचे दर टिकून असल्याने शेतकऱ्यांना दिलासा मिळाला आहे.

राज्यात गतवर्षीच्या हंगामातील ५० ते ६० हजार टन बेदाणा शिल्लक आहे. बेदाण्याची मागणी असल्याने उठाव होत आहे. त्यामुळे गतवर्षीच्या हंगामातील बेदाणा नवीन बेदाणा विक्रीस येण्यापूर्वी संपेल अशी शक्यता आहे. येत्या काळात बेदाण्याचे दर टिकून राहण्याची आशा शेतकऱ्यांनी व्यक्त केली आहे.

सांगली जिल्ह्यातील कवठेमहांकाळ तालुक्यातील नागज परिसरात बेदाणा निर्मिती होते. गेल्यावर्षीचा बेदाणा निर्मितीचा हंगाम तीन महिने चालला. जानेवारीच्या दुसऱ्या आठवड्यापासून या परिसरातील बेदाणा शेडची दुरुस्ती, डागडुजी आणि स्वच्छतेची कामे सुरू करण्यासाठी बेदाणा शेड मालकांनी नियोजन केले आहे.

त्यानुसार परराज्यातील मजूर देखील या कामासाठी बोलावले आहेत. त्यामुळे यंदाचा बेदाणा निर्मितीचा हंगाम जानेवारीच्या शेवटच्या आठवड्यापासून सुरवात होण्याची शक्यता आहे. नवीन बेदाणा मार्केटमध्ये फेब्रुवारीच्या पहिल्या किंवा दुसऱ्या आठवड्यात येईल.

बेदाण्याचे प्रतवारीनुसार दर (प्रति किलोचे)

हिरवा...१२०-२००

पिवळा...१३०-१६०

काळा...३०-९५