Sangli News : गेल्या महिन्यापासून बेदाण्याचे दर टिकून आहेत. रक्षाबंधन, गणपती आणि जन्माष्टमी या सणांनिमित्त देशभरातील व्यापाऱ्यांकडून बेदाणा खरेदी सुरु झाली आहे. येत्या आठ ते दहा दिवसांत खरेदीसाठी मोठी लगबग सुरु होईल. सणाच्या पार्श्वभूमीवर बेदाण्याच्या दरात वाढ होईल, अशी शक्यता बेदाणा उद्योगातील जाणकारांनी व्यक्त केली आहे.

राज्यात बेदाण्याचे विक्रमी उत्पादन झाले आहे. आवक आणि उठावही कमी अधिक होत आहे. गेल्या दोन महिन्यांपासून बेदाण्याचे दर टिकून असल्याने बेदाणा उत्पादकांना किंचित दिलासा मिळाला आहे.

राज्यात सुमारे ३ लाख टन बेदाण्याचे उत्पादन झाले आहे. आत्तापर्यंत सुमारे ४० टक्के बेदाण्याची विक्री झाली आहे. तर ६० टक्के बेदाणा शीतगृहात शिल्लक आहे, अशी माहिती बेदाणा व्यापाऱ्यांनी दिली आहे.

ऑगस्ट, सप्टेंबर, ऑक्टोबर, नोव्हेंबर या चार महिन्यांत रक्षाबंधन, श्रावण, गणपती, गोकूळ अष्टमी, दसरा, दिवाळी हे सण आहेत. त्यामुळे या सणांच्या पार्श्वभूमीवर बेदाण्याची खरेदी पंधरा ते वीस दिवस अगोदर केली जाते.

ऑगस्ट, सप्टेंबर महिन्यात श्रावण, रक्षाबंधन, गणपती हे दोन उत्सव आले आहेत. त्यामुळे गेल्या आठवड्यापासून बेदाणा खरेदीसाठी देशभरातील व्यापारी सक्रिय झाले आहेत.

हंगामाच्या सुरुवातीपासून दरात चढ-उतार होत होती. त्यामुळे शेतकऱ्यांनी बेदाणा विक्री करण्याचे थांबविले होते. दरम्यान, त्यानंतर उत्सवाच्या खरेदीसाठी आत्तापासून व्यापारी नियोजन करत आहेत.

शिल्लक बेदाण्यापैकी सुमारे ३० ते ४० टक्के बेदाण्याची विक्री होईल, असा अंदाज व्यक्त केला जात आहे. अनेक शेतकरी सणांनिमित्त बेदाणा विक्रीसाठी थांबले आहेत. सध्या सण, उत्सव तोंडावर आले आहेत. त्यामुळे शेतकरी बेदाणा विक्रीचे नियोजन करू लागला आहे.

चांगल्या प्रतीचा बेदाणा ः १५० ते २१०

दोन प्रतिचा बेदाणा ः ९०ते १५० पर्यंत