Jalgaon News : खानदेशात केळी दरांवर मागील सात ते आठ दिवसांत सतत दबाव वाढला आहे. आवकेत मोठी वाढ मागील पंधरवड्यात झाली असून, हंगामी फळांमुळे केळीस उठाव कमी असल्याची माहिती मिळाली आहे. दर्जेदार किंवा काश्मीर, उत्तरेकडील मॉल्समध्ये पाठवणुकीच्या केळीचे दर मागील महिन्याच्या पहिल्या पंधरवड्यात १६०० ते १७०० रुपये प्रतिक्विंटल, असे होते.

त्यात मागील महिन्याच्या दुसऱ्या पंधरवड्यात क्विंटलमागे १५० ते २०० रुपयांची घसरण झाली. सध्या उत्तरेकडे व काश्मिरात पाठवणुकीच्या केळीचे दर प्रतिक्विंटल १२०० ते १२५० रुपये प्रतिक्विंटल, असे आहेत. सध्या बाजारात आंबा, चिकू, कलिंगड आदी फळांची रेलचेल आहे. परिणामी, केळीस उठाव कमी झाला आहे. यातच केळीची आवकही वाढली आहे.

सध्या खानदेशात रोज ३६५ ट्रक (एक ट्रक १६ टन क्षमता) केळीची आवक होत आहे. रावेर, यावल व मुक्ताईनगरात मिळून रोज २९० ट्रकपेक्षा अधिकची केळी आवक होत आहे. धुळ्यातील शिरपूर, नंदुरबारातील शहादा, तळोदा व अक्कलकुवा भागांतही केळीची आवक चांगली आहे. जळगावातील चोपडा, जामनेर, जळगाव, पाचोरा-भडगाव भागांत केळीची आवक कमी आहे.

कमी दर्जाच्या केळीचे दर ७००, ८०० रुपये प्रतिक्विंटल, असे आहेत. मध्यम दर्जाच्या केळीस १००० ते १२०० रुपये प्रतिक्विंटलचा दर आहे. सध्या मध्य प्रदेश, गुजरामधूनही केळीची पाठवणूक उत्तरेकडे सुरू आहे. यामुळे बाजारात केळीसंबंधीची मोठी मागणी तयार होत नसल्याची स्थिती आहे. खानदेशातून सध्या उत्तरेसह राज्यातील मुंबई, ठाणे, कल्याण, नागपूर, तसेच छत्तीसगड, राजस्थानातही केळीची पाठवणूक सुरू आहे

बऱ्हाणपुरातही आवक अधिक

मध्य प्रदेशातील बऱ्हाणपूर येथेही केळीची आवक वाढली आहे. तेथे रोज १८० ते २०० ट्रक केळीची आवक होत आहे. तेथेही दर कमी असून, कमाल दर १३०० रुपये प्रतिक्विंटल, असे आहेत. बऱ्हाणपुरात खानदेशातील रावेर, मुक्ताईनगरातून केळीची पाठवणूक काही एजंट करीत आहेत.