Pune News : भारतात तुरीला पर्याय म्हणून काही भागांमध्ये मसूरला पसंती दिली जाते. त्यामुळे तुरीच्या बाजारासाठी मसूरचे दर महत्त्वाचे आहेत. पण यंदा देशात मसूरचे उत्पादनही मागणीपेक्षा कमी राहण्याचा अंदाज आहे.

त्यामुळे मसूरची गरज भागविण्यासाठी आयातीवर अवलंबून राहावे लागणार आहे. त्यामुळे मसूरच्या दरात वाढ होऊ शकते, असा अंदाज जाणकारांनी व्यक्त केला. सध्या मसूरला प्रतिक्विंटल सरासरी ५ हजार ८०० ते ६ हजार २०० रुपयांचा भाव मिळत आहे.

देशात यंदा तुरीच्या उत्पादनात मोठी घट झाली. त्यामुळे आयात करूनही गरज पूर्ण होणार नाही, अशी स्थिती आहे. सरकार तुरीचे भाव कमी करण्यासाठी विविध उपायांची चाचपणी करत आहे.

तर देशातील काही भागांमध्ये तुरीला पर्याय म्हणून मसूरचा वापर होऊ शकतो. असा तो होताना दिसतो. यंदा देशात मसूरचे उत्पादन वाढल्याचा दावा सरकारने केला.

मागील हंगामात देशात जवळपास १३ लाख टन मसूरचे उत्पादन झाले होते. तर यंदा उत्पादन १६ लाख टनांवर पोहोचेल, असा अंदाज सरकारने व्यक्त केला.

यंदा आयात कमी राहण्या अंदाज

सरकारने यंदा देशातील उत्पादन ३ लाख टनांनी वाढल्याचे म्हटले आहे. पण शेतकऱ्यांच्या मते यंदा उत्पादनात वाढ झाली नाही. तर पिकाला अनेक भागांत फटका बसला होता. देशात वर्षाला २२ लाख टन मसूरचा वापर होतो.

त्यामुळे यंदाही सरकारला आयात करावी लागणार आहे. भारत दरवर्षी मसूरची मोठ्या प्रमाणात आयात करतो. गेल्या हंगामात विक्रमी ८ लाख ५० हजार टनांच्या दरम्यान आयात झाली होती. तर यंदा आयात ७ लाख टनांवरच स्थिरावेल असा अंदाज आहे.

बाजार नरमण्याची शक्यता कमीच

यंदा भारताची आयात वाढणार असल्याचा फायदा कॅनाडाला होऊ शकतो. यंदा कॅनडाची निर्यात वाढणार आहे. त्यामुळे कॅनडात मसूरचा शिल्लक साठा कमी राहील. तर ऑस्ट्रेलियात उत्पादन घटल्याने निर्यातही कमी राहण्याचा अंदाज आहे. त्यामुळे मसूरचा बाजार जास्त नरमण्याची शक्यता कमीच आहे, असे बाजार विश्लेषक सांगत आहेत.

तूर, उडीद, मुगाच्या दरातही सुधारणा

केंद्र सकारने यंदा मसूरला ६ हजार रुपयांचा हमीभाव जाहीर केला. सध्या मसूर आवकेचा हंगाम असूनही दर हमीभावाच्या दरम्यान आहेत. सध्या मसूरला सरासरी प्रतिक्विंटल ५ हजार ८०० ते ६ हजार २०० रुपयांच्या दरम्यान भाव मिळत आहे.

तूर, उडीद आणि मुगाचे भाव तेजीत असल्याने पुढील काळात मसूरलाही आधार मिळण्याची शक्यता आहे. मसूरचे दर वाढल्यास तुरीच्या दरातील तेजी आणखी वाढण्यास मदत होऊ शकते, असा अंदाज जाणकारांनी व्यक्त केला.