Solapur News : सोलापूर कृषी उत्पन्न बाजार समितीच्या आवारात गतसप्ताहात डाळिंबाची आवक तुलनेने कमी राहिली, पण मागणीत सातत्य राहिल्याने डाळिंबाचे दर पुन्हा एकदा वधारल्याचे बाजार समितीच्या सूत्रांकडून सांगण्यात आले.

बाजार समितीच्या आवारात गतसप्ताहात डाळिंबाची आवक रोज एक ते दोन टनापर्यंत राहिली. गेल्या काही महिन्यांपासून डाळिंबाच्या आवकेत सातत्याने चढ-उतार होतो आहे. पण मागणीच्या प्रमाणात आवक नसल्याने डाळिंबाला चांगला उठाव मिळाला आणि दरही वाढले. या सप्ताहातही पुन्हा तशीच स्थिती राहिली. डाळिंबाची आवक सांगोला, मंगळवेढा, माढा, पंढरपूर, मोहोळ या स्थानिक भागातून झाली.

डाळिंबाला प्रतिक्विंटलला किमान १००० रुपये, सरासरी ४५०० रुपये आणि सर्वाधिक २२ हजार रुपये असा दर मिळाला. मागच्या आठवड्याड्याच्या तुलनेत दरामध्ये ५०० ते ७०० रुपयांच्या फरकाने दर वाढले. त्याशिवाय घेवडा, भेंडी आणि हिरवी मिरचीचे दरही काहीसे वाढले.

त्यांची आवक रोज प्रत्येकी २० ते ५० क्विंटलपर्यंत राहिली. घेवड्याला प्रतिक्विंटलला किमान ६००० रुपये, सरासरी ७००० रुपये आणि सर्वाधिक ८००० रुपये, भेंडीला किमान १००० रुपये, सरासरी ३००० रुपये आणि सर्वाधिक ५००० रुपये आणि हिरव्या मिरचीला किमान १५०० रुपये, सरासरी ३५०० रुपये आणि सर्वाधिक ५००० रुपये असा दर मिळाला.

कांद्याचे दर स्थिर

या सप्ताहात कांद्याचे दर काहीसे स्थिर राहिले. कांद्याची आवक रोज ८० ते १०० गाड्यांपर्यंत राहिली. कांद्याची आवक सर्वाधिक बाहेरील जिल्ह्यातून झाली. कांद्याला प्रतिक्विंटलला किमान १०० रुपये, सरासरी ११०० रुपये आणि सर्वाधिक २२०० रुपये असा दर मिळाला.