Pomegranate Price: डाळिंबाच्या एका क्रेटला साडेसहा हजार रुपये दर

Pune News: आळेफाटा बाजार समितीत बुधवारी (ता. ९) डाळिंबाच्या २० किलोच्या एका क्रेटला प्रतवारीनुसार सहा हजार ५०० रुपयांचा उच्चांकी बाजारभाव मिळाला आहे. जुन्नर कृषी उत्पन्न बाजार समितीत असणाऱ्या उपबाजारात कांद्याप्रमाणे आता डाळिंबाचे दररोज लिलाव मोठ्या प्रमाणावर होऊ लागले आहे.

यामध्ये एक नंबर डाळिंबास वीस किलोच्या एका क्रेटला प्रतवारीनुसार सहा हजार ५०० रुपयांचा भाव मिळाला आहे. त्या खालोखाल त्याच्या दोन नंबर डाळिंबाच्या एका क्रेटला चार हजार रुपयांचा बाजारभाव मिळाला आहे.

तर तीन नंबरच्या एका वीस किलोच्या क्रेटला दोन हजार ५०० रुपये बाजारभाव मिळाला तर चार नंबरच्या एका वीस किलोच्या क्रेटला १२०० रुपयांचा बाजारभाव मिळाला.तसेच बाजार समितीमध्ये चार हजार विक्रमी क्रेटची आवक झाली होती.

दरम्यान, आळेफाटा येथील या बाजार समितीत पारनेर, संगमनेर, श्रीगोंदा, कर्जत, जामखेड, शिरूर, अहिल्यानगर या ठिकाणाहून शेतकरी डाळिंब विक्रीसाठी येत असल्याने त्यामुळे पुणे आणि नगर जिल्ह्यासाठी ही महत्त्वाची बाजार पेठ आहे.