Jalgaon News : खानदेशात कापसाची आवक टिकून आहे. रोज ५० ते ५२ हजार क्विंटल कापूस बाजारात येत असून, खेडाखरेदीत दर मात्र नीचांकी स्थितीत आहेत. कापूस हमीभाव हा केवळ घोषणेपुरताच असल्याची स्थिती आहे.

सध्या सरकीचे दर २६०० ते २७०० रुपये प्रतिक्विंटल आहेत. त्यात सुधारणा झालेली नाही. यामुळे कापसाचे दर खानदेशात दबावातच आहेत. खानदेशात कापसाची बाजार समित्यांत आवक होत नाही. त्याची खेडा खरेदी होते. खेडा खरेदीत सध्या कापसाला ६४०० ते ६५०० रुपये प्रतिक्विंटलचा दर दर्जेदार कापसाला मिळत आहे. फरदड कापसाचे दर ५००० रुपये प्रतिक्विंटल आहेत.

दरात मागील महिनाभरात क्विंटलमागे ४०० रुपयांची घसरण झाली आहे. जानेवारीच्या सुरुवातीपर्यंत कापसाचे दर प्रतिक्विंटल ६९०० रुपये होते. कापसाची आवक महिनाभरात वाढली आहे. ३० ते ३२ दिवसांपूर्वी खानदेशात रोज २५ ते २६ हजार क्विंटल कापसाची आवक होत होती.

त्यात मागील काही दिवसांत सतत वाढ झाली असून, सध्या आवक ५० ते ५२ हजार क्विंटल आहे. रोज १० हजार कापूसगाठींची (एक गाठ १७० किलो रुई) निर्मिती खानदेशात होत आहे. मागील महिन्यात रोज पाच ते साडेपाच हजार कापूसगाठींची निर्मिती खानदेशात सुरू होती.

हमीभाव मिळालाच नाही

खानदेशात खेडा खरेदीत यंदा कापसाची हमीभावात खरेदीच झालेली नाही. शासनाने मोठा गाजावाजा करून हमीभाव जाहीर केले. यानंतर कापूस खरेदीच्या बाता केल्या. परंतु कुठल्याही कापूस उत्पादकास खेडा खरेदीत हमीभावाएवढा दर म्हणजेच ७०२० रुपये मिळालेला नाही. यामुळे शेतकऱ्यांत नाराजी व सरकारविषयी रोष आहे. दुसरीकडे कापूस महामंडळाने देखील (सीसीआय) हमीभावाने अल्प कापूस खरेदी केली आहे.