Onion Market Update रांजणगाव गणपती : ‘‘पुणे जिल्ह्यातील पहिले नाफेड कांदा खरेदी केंद्र (Onion Procurement Center) शिरूर तालुक्यात लवकरच सुरू होणार आहे. शिरूर तालुक्याबरोबर पारनेर, श्रीगोंदे, खेड, दौंड या तालुक्यातील कांदा उत्पादकांना (Onion Farmer) याचा फायदा होईल,’’ असे भाजपच्या उद्योग आघाडीचे जिल्हाध्यक्ष संजय पाचंगे यांनी सांगितले.

शिरूर तालुक्यात नाफेड कांदा खरेदी केंद्र सुरू करावे, अशी मागणी पाचंगे यांनी निवेदनाद्वारे केली होती. त्यानंतर शिरूर बाजार समितीने नाफेडकडे शिरूर, पिंपळे जगताप, पाबळ येथे केंद्र सुरू करण्याचा प्रस्ताव दिला. जिल्ह्यात शिरूर तालुका हा सर्वात जास्त कांदा उत्पादन करणारा आहे. यावर्षी शिरूर तालुक्यात साधारण १५५६१ हेक्टरवर कांदा लागवड झाली आहे.

नाशिक जिल्हात नाफेड केंद्र सुरू होण्याअगोदर कांद्याला ४५० बाजारभाव मिळत होता, नाफेड केंद्र सुरू झाल्यानंतर ९५० पर्यंत बाजारभाव मिळत आहे. त्यामुळे शिरूर तालुक्यात नाफेड कांदा खरेदी केंद्र सुरू झाले तर शेतकऱ्यांना मोठा दिलासा मिळेल.

व्यापाऱ्यांच्या मनमानीला आळा बसेल. शिरूर बाजार समितीचे प्रभारी शंकर कुंभार यांनी तातडीने नाफेडकडे शिरूर, पिंपळे जगताप, पाबळ येथे नाफेड कांदा खरेदी केंद्र सुरू करावे, असा प्रस्ताव दाखल केला आहे.

शिरूर बाजार समितीत कांदा व इतर शेतीमालाला योग्य भाव दिला जात नाही. त्यामुळे इतर ठिकाणी शेतीमाल विक्रीस न्यावा लागत आहे, अशा शेतकऱ्यांच्या तक्रारी आल्या आहेत. शेतकऱ्यांनी आपली फसवणूक होत असेल तर आमच्याशी थेट संपर्क साधावा, असे आवाहन पाचंगे यांनी केले.