Nagar News : नगर येथील दादा पाटील शेळके कृषी उत्पन्न बाजार समितीत कांद्याच्या दरात सुधारणा होत आहे. सोमवारी (ता. १६) झालेल्या लिलावात कमाल दर ३८०० रुपये क्विंटलपर्यंत मिळाला होता. गुरुवारी (ता. १९) झालेल्या लिलावात कमाल दर ४२०० रुपयापर्यंत मिळाला. गेल्या अनेक दिवसांच्या प्रतीक्षेनंतर पहिल्यांदाच बाजारात कांदादरात सुधारणा दिसू लागली आहे.

नगर जिल्ह्यात दरवर्षी कांद्याची वर्षभरात साधारणपणे २ लाख हेक्टरपर्यंत लागवड होत असते. यंदा पावसाचे प्रमाण कमी आहे. त्यामुळे कांदा क्षेत्रात काहीशी घट होणार असली तरी पाणी उपलब्ध असलेल्या भागात शेतकरी कांदा लागवड करणारच आहेत असे दिसतेय. मागील वर्षभरापासून कांद्याला दर नाही.

काही महिन्यापूर्वी कांदादर वााढू लागताच निर्यात शुल्क लागू झाल्याने दरात पुन्हा घसरण झाली. त्यानंतर चार महिन्यांपासून कांदादर अडीच हजारांवर स्थिर होते. मार्च-एप्रिलमध्ये झालेल्या अवकाळी पावसाचा कांद्याला मोठा फटका बसला. साठवण करून ठेवलेला कांदा फार दिवस टिकला नाही.

('ॲग्रोवन'चं व्हॉट्सअ‍ॅप चॅनल जॉईन करण्यासाठी येथे क्लिक करा)

नासाडी झाल्याने यंदा कांदा उत्पादकांना आर्थिक फटका सोसावा लागला आहे. यंदा पहिल्यांदाच कांदा दरात काहीशी सुधारणा होताना दिसत आहे. गेल्या आठ दिवसापासून कांदा दरात सुधारणा होत असून अडीच हजारांवर स्थिर असलेला कांदा गुरुवारच्या लिलावात किमान ५०० ते कमाल ४२०० रुपयांपर्यंत गेला असून सरासरी ३५०० रुपयांपर्यंत दर मिळाला.

सोमवारी (ता. १६) झालेल्या लिलावात चांगल्या दर्जाच्या कांदाला ३८०० रुपयांपर्यंत तर सरासरी २७०० रुपये दर मिळाला होता. बाजारात गावरान कांद्याची आवक कमी झाली आहे.

नगर बाजार समितीत साधारणपणे दर लिलावाला ८० हजार ते एक लाख गोण्यापर्यंत आवक होत असते. सध्या मात्र आवक कमी झाली असून दर लिलावाला ४० ते ४५ हजार गोण्यापर्यंत आवक होत आहे. पावसाळी लाल कांद्याचीही आवक वाढू लागली आहे. याच दरम्याण लाल कांद्यालाही दर मिळत आहेत.