Nashik News : केंद्र सरकारकडून कांदाप्रश्नी घेतलेल्या गेल्या दीड वर्षातील विविध धोरणांमुळे शेतकऱ्यांचे कोट्यवधी रुपयांचे नुकसान झाले. आता शेतकऱ्यांना दराचा काहीसा दिलासा मिळत असताना केंद्र सरकार खरेदी केलेला बफर स्टॉकमधील कांदा बाजारात आणून ताटात माती कालवीत असल्याची भावना शेतकऱ्यांमधून व्यक्त होत आहे. ‘नाफेड’ व ‘एनसीसीएफ’च्या हालचालींमुळे बाजारात दर पडल्याचे समोर आले आहे. जिल्ह्यात मंगळवारी (ता. ३) व बुधवारी (ता. ४) प्रमुख बाजार समितींमध्ये विक्री झालेल्या कांदादरात क्विंटलमागे २५० ते ४०० रुपयांपर्यंत घसरण झाली.

बफर स्टॉकमध्ये पावणेपाच लाख टन कांद्याची खरेदी करून साठवला आहे. हा कांदा दरात मोठी वाढ झाल्यानंतर बाजारात येणे अपेक्षित आहे. अजूनही बाजारात शेतकऱ्यांच्या माध्यमातून आवक होत असताना हा कांदा बाहेर आणला जात असल्याने बाजारात अस्थिरता निर्माण झाली. एकीकडे मे ते जुलैपर्यंत कांद्याची खरेदी विविध केंद्रांवर झाली. त्या वेळी बाजार समित्यांमधील दराच्या तुलनेत हे दर ४०० ते ५०० रुपयांनी कमी होते. तर शेवटच्या टप्प्यात ज्या शेतकऱ्यांच्या कांद्याची खरेदी झाली त्यांना अद्याप देयके मिळाले नाहीत. अशातच शेतकऱ्यांच्या चाळीत कांदा असताना बफर स्टॉकमधील कांदा बाजारात आणण्याचा घाट घातला जात आहे. त्यामुळे शेतकऱ्यांमध्ये संतापाचे वातावरण आहे.

‘एनसीसीएफ’कडून कांदापुरवठा सुरू

‘नाफेड’ने मुंबई, बंगळूर, भुवनेश्वर व पाटणा या शाखांच्या माध्यमातून कांदा पुरवठ्यासाठी निविदा प्रसिद्ध केल्या आहेत. तर यापूर्वीच गोणी वाहतूक या संदर्भातही निविदा अंतिम टप्प्यात आहेत. दुसरीकडे याच पद्धतीने ‘एनसीसीएफ’नेही तयारी पूर्ण केली आहे. २०० टनांवर कांदा दिल्ली येथे पाठविण्यात आल्याचे कळविण्यात आले.