केंद्र सरकारने या रब्बी हंगामात शेतकऱ्यांकडून आतापर्यंत ६९.२४ लाख टन गहू (Wheat) खरेदी केला आहे. हमीभावाने (MSP) खरेदी करण्यात आलेल्या या गव्हापोटी १४ हजार कोटी रुपये अदा करण्यात आले आहेत. केंद्र सरकारने याबाबतचे प्रसिद्धीपत्रक प्रसारित केले आहे.

रब्बी विपणन हंगाम २०२२-२०२३ साठी सध्या मध्य प्रदेश, पंजाब, हरियाणा, उत्तर प्रदेश, गुजरात, राजस्थान, हिमाचल प्रदेश, उत्तराखंड, चंदीगड येथे गव्हाची हमीभावाने (MSP) खरेदी सुरु आहे.

एप्रिल ते मार्च दरम्यान रब्बी विपणन हंगाम सुरु असतो. मात्र एप्रिल ते जूनपर्यंत मोठ्या प्रमाणात गव्हाची खरेदी (Wheat procurement) केली जाते. केंद्र सरकारच्या प्रसिद्धीपत्रकानुसार १७ एप्रिलपर्यंत सरकारने ६९.२७ लाख टन गहू हमीभावाने (MSP) खरेदी केला आहे. या सरकारी खरेदीचा लाभ ५.८६ लाख शेतकऱ्यांना झाला असून त्यांच्या बँक खात्यांत १३,९५१.४१ कोटी रुपये जमा करण्यात आले आहेत.

केंद्र सरकारने यंदा गव्हाला २०१५ रूपये प्रति क्विंटल असा हमीभाव (MSP) जाहीर केला आहे. केंद्र सरकारने केलेल्या या हंगामातील आतापर्यंतच्या गहू खरेदीपैकी ३२,१६,६६८ टन गहू पंजाबमधून (Punjab) खरेदी करण्यात आला आहे. हरियाणातून (Haryana) २७,७६,४९६ टन, मध्य प्रदेशातून (Madhya Pradesh) ८,९८,६७९ टन गहू खरेदी करण्यात आला आहे.

२०२०-२०२२ सालातल्या खरीप विपणन हंगामातील भातपिकाची खरेदी (Paddy Procurement) सुरु असून शेतकऱ्यांना हमीभावाचा (MSP) लाभ दिला जात असल्याचे प्रसिद्धीपत्रकात नमूद करण्यात आले आहे.

खरीप विपणन हंगाम ऑक्टोबर ते सप्टेंबरदरम्यान सुरु असतो. १७ एप्रिलपर्यंत केंद्र सरकारने सर्व राज्य आणि केंद्रशासित प्रदेशांकडून ७५४.०८ लाख टन भातपिकाची (खरीपातील ७५०.९५ लाख टन आणि रब्बीतील ३.१४ लाख टन) हमीभावाने खरेदी केली आहे. आजवर १ कोटी ८ लाख शेतकऱ्यांना १,४७,८०० कोटी रुपयांची रक्कम अदा करण्यात आल्याची माहिती या पत्रकाद्वारे देण्यात आली आहे.