Market Bulletin:

आल्याचे दर स्थिर

राज्यातील बाजारात आल्याचे भाव मागील ३ आठवड्यांपासून स्थिर आहेत. बाजारातील आवकही चांगली आहे. तर उठावही येत असल्याचे व्यापारी सांगत आहेत. आल्याचे उत्पादन वाढल्याने दरात सतत घट दिसून आली होती. पण दर काहीसे स्थिरावल्याने शेतकऱ्यांनाही दिलासा मिळाला आहे. आल्याला सध्या बाजारात सरासरी २ हजार ५०० ते ३ हजार रुपये दर मिळत आहे. आल्याची बाजारातील आवक कायम राहण्याची शक्यता आहे. तर उठावही चांगला राहण्याची शक्यता आहे. त्यामुळे आल्याचे भावही टिकून राहतील, असा अंदाज आले बाजारातील अभ्यासकांनी व्यक्त केला.

करडईची आवक घटली

करडईला तेलासाठी चांगली मागणी आहे. बाजारातील आवक कमी झाली आहे. देशात करडईचे उत्पादन यंदा कमी झाले आहे. याचा आधार दराला मिळत आहे, असे व्यापारी सांगत आहेत. सध्या करडईला बाजारात सरासरी ६ हजार ५०० ते ७ हजार रुपयांच्या दरम्यान दर मिळत आहे. बाजारातील आवक पुढील २ महिने कमीच राहण्याची शक्यता आहे. करडईला देशात मागणी वाढत आहे. त्यामुळे करडईचे दर पुढील काही महीने टिकून राहतील, असा अंदाज तेल बाजारातील अभ्यासकांनी व्यक्त केला.

पपईचे दर टिकून

बाजारातील पपईचे दर टिकून आहेत. मागील काही आठवड्यांपासून पपईच्या दरात सुधारणा झाली. ही सुधारणा कायम आहे. बाजारातील पपईची आवक कमी झाली आहे. पावसामुळे पपई पिकाचे राज्यातील बहुतांशी भागात नुकसान झाले. याचा परिणाम बाजारावर दिसत आहे. सध्या पपई १७०० ते २ हजार रुपयांच्या दरम्यान आहेत. पपईची बाजारातील आवक पुढील काही महीने कमीच राहण्याची शक्यता आहे. त्यामुळे पपईचे दरही टिकून राहू शकतात, असा अंदाज पपई बाजारातील अभ्यासकांनी व्यक्त केला.

फ्लाॅवर दर तेजीत

राज्यातील बाजारात फ्लाॅवरची आवक कमी झाली आहे. पावसामुळे सर्वच भाजीपाल्याची आवक घटलेली आहे. त्यामुळे दरात सुधारणा झाली आहे. याचा आधार फ्लाॅवरला मिळत आहे. फ्लाॅवरची आवक कमी झाली असल्याने दरात सुधारणा झाली. सध्या फ्लाॅवरला सरासरी २५०० ते ३ हजार रुपये प्रतिक्विंटलच्या दरम्यान दर मिळत आहे. पुढील काही आठवडे बाजारातील फ्लाॅवरची आवक कमीच राहण्याचा अंदाज आहे. त्यामुळे फ्लाॅवरचे दरही टिकून राहतील, असा अंदाज भाजीपाला बाजारातील व्यापाऱ्यांनी व्यक्त केला.

गहू दरात सुधारणा

देशातील बाजारात गव्हाची आवक कमी झाली. त्यानंतर दरातही काहीशी सुधारणा झाली. पंजाब, हरियाना, मध्य प्रदेश, उत्तर प्रदेश आणि इतरही राज्यांमध्ये गव्हाची आवक कमीच आहे. पावसामुळे आवकेवर परिणाम होत असल्याचे व्यापारी आणि शेतकरी सांगत आहेत. सरकारची खरेदी यंदा ३०० लाख टनांवर झाली. देशात यंदा गव्हाचा पुरवठाही चांगला असल्याचे सरकारचे म्हणणे आहे. मात्र, बाजारातील आवक कमी असल्याने दर सुधारले आहेत. सध्या बाजारात गव्हाला गुणवत्तेप्रमाणे आणि वाणानुसार सरासरी २ हजार ६०० ते ३ हजार ९०० रुपयांच्या दरम्यान भाव मिळत आहे. देशातील बाजारात पुढील काळातही गव्हाची आवक कमीच राहील. त्यामुळे गव्हाचे दरही टिकून राहू शकतात, असा अंदाज गहू बाजारातील अभ्यासकांनी व्यक्त केला