Agrowon Podcast: हरभरा भाव दबावातच; मेथी तेजीत; लसूण-वांगी दर स्थिर, लिंबात नरमाई

Market Bulletin:

मेथीचे दर तेजीत

राज्यातील बाजारात पावसामुळे भाजीपाला पिकाची आवक कमी झाली आहे. भाजीपाला पिकांना पावसाचा फटका बसला. अनेक भागात सततच्या पावसाने पीके हातची गेली. त्यामुळे बाजारातही आवक कमी आहे. मेथीची आवकही मागणीच्या तुलनेत कमी आहे. त्यामुळे मेथील सध्या बाजारात ३ हजार ते ५ हजार रुपये प्रतिक्विंटलच्या दरम्यान दर मिळत आहे. तर प्रतिजुडी ११ ते १२ रुपये दर आहे. मेथीची बाजारातील आवक आणखी काही आठवडे कमीच राहण्याची शक्यता आहे. त्यामुळे मेथीचे दरही टिकून राहू शकतात, असा अंदाज व्यापारी व्यक्त करत आहेत.

लसणाचे भाव टिकून

लसणाचे भाव राज्यातील बाजारात मागील काही आठवड्यांपासून टिकून आहेत. बाजारातील लसणाची आवक कमीच आहे. तर दुसरीकडे लसणाला चांगला उठावही मिळत आहे. त्यामुळे दरपातळी टिकून आहे. लसणाला सध्या बाजारात गुणवत्तेप्रमाणे सरासरी ५ हजार ते ७ हजार रुपयांचा दर मिळत आहे. गुवत्तापूर्ण लसूण यापेक्षाही जास्त दरात विकला जात आहे. लसणाची आवक बाजारात पुढील काही आठवडे मर्यादीतच राहण्याची शक्यता आहे. त्यामुळे लसणाचे दरही टकून राहू शकतात, असा अंदाज लासूण बाजारातील जाणकार शेतकरी आणि व्यापारी व्यक्त करत आहेत.

लिंबाचे भाव नरमले

लिंबाचे भाव मागील २ महिन्यांमध्ये मोठ्या प्रमाणात कमी झाले आहेत. मे महिन्यात सरासरी ७ हजार रुपयाने विकले जाणारे लिंबू आता बाजारात २ हजार ५०० ते ३ हजार रुपयाने विकाले जात आहेत. बाजारातील लिंबाची आवक मर्यादीतच आहे. मात्र लिंबाला पावसामुळे उठाव कमी झाला. त्यामुळे आवक कमी असूनही दर कमीच आहेत. लिंबा उत्पादक पट्ट्यात अनेक भागात जोरदार पाऊस झाला आहे. याचा फटका लिंबू पिकाला बसला. परिणामी अनेक भागात फळगळ होऊन सध्या कमी माल उपलब्ध असल्याचे शेतकरी सांगत आहेत. पुढे पाऊस वाढल्यानंतर आवक आणखी कमी होऊ शकते आणि उठावही मर्यादीतच राहील, असे व्यापारी सांगत आहेत.

वांगी दर टिकून

बाजारात मागील काही दिवसांपासून वांगी आवक कमी झाली आहे. मात्र दुसरीकडे वांगीला चांगला उठाव आहे. त्यामुळे वांगीचे दर सुधारले आहेत. राज्यातील बहुतांशी भागात पाऊस सुरु आहे. याचा परिणाम वांगी उत्पादनावर होत आहे. त्यामुळे आवक कमी झाली, असे शेतकरी सांगत आहेत. तर बाजारात आज वांगी सरासरी ३ हजार ते ४ हजार रुपये प्रतिक्विंटलच्या दरम्यान विकली गेली. बाजारातील आवक पुढील काही आठवडे कायम राहण्याची शक्यता आहे. त्यामुळे वांगी दरही टिकून राहू शकतात, असा अंदाज वांगी बाजारातील व्यापारी व्यक्त करत आहेत.

हरभरा दबावातच

देशातील बाजारात मागील तीन महिन्यापासून हरभरा भाव दबावातच आहेत. देशात यंदा हरभरा उत्पादन वाढले. तसेच हरभऱ्याची विक्रमी आयातही झाली. त्यामुळे देशात हरभऱ्याचा पुरवठा चांगला आहे. याचा दबाव हरभरा दरावर आला आहे. सध्या बाजारात हरभरा प्रतिक्विंटल सरासरी ५ हजार २०० ते ५ हजार ७०० रुपयांच्या दरम्यान विकला जात आहे. देशात हरभऱ्याची उपलब्धता चांगली आहे. तसेच निर्यातदार देशांमध्ये लागवडही वाढत आहे. सरकारने आयातीवर केवळ १० टक्के शुल्क लागू केले आहे. त्यामुळे आयात शक्य आहे. याचा दबाव दरावर राहणार आहे, असा अंदाज हरभरा बाजारातील अभ्यासकांनी व्यक्त केला.