Crop Damage : कंत्राटदाराच्या दुर्लक्षितपणामुळे शेतीपिकाचे मोठे नुकसान

Buldana News : चिखली तालुक्यातील मालगणी-सावरगाव-वाघापूर- अंत्रीकोळी-गोदरी-चांदई या रस्त्याचे रुंदीकरण व मजबुतीकरणाचे काम सुरू असून, या रस्त्यावर डांबरीकरण करण्यात आले आहे. मात्र रस्त्यालगत नाल्या न काढल्यामुळे अंत्रीकोळी शिवारातील शेतकऱ्यांचे पीक पूर्णपणे पाण्यात गेले आहे.

शेतकऱ्यांनी दुबार पेरणी केल्यानंतरही पुन्हा नुकसान झाल्याची गंभीर स्थिती निर्माण झाली आहे. या प्रकरणी प्रशासनाने तातडीने लक्ष देत शेतकऱ्यांना भरपाई द्यावी, संबंधित कंत्राटदाराविरुद्ध कारवाई करावी, अशी मागणी शेतकरी नेते विनायक सरनाईक, तसेच नितीन राजपूत यांनी तहसीलदारांकडे केली आहे. तसेच त्यांनी तलाठी व मंडळ अधिकाऱ्यांसह प्रत्यक्ष पाहणीही केली.रस्ता तयार करताना त्याच्या आजूबाजूला नाल्या असणे गरजेचे असते.

ते अपेक्षितही राहते. परंतु या रस्त्याचे काम करताना नाल्या नसल्याने आता पावसाचे पाणी थेट शेतांमध्ये साचते आहे. या प्रकरणात कंत्राटदाराचा निष्काळजीपणा समोर आला आहे. वास्तविक नाल्या नसतील तर पाण्याचा निचरा होणार नाही, असे शेतकऱ्यांनी यापूर्वीच निदर्शनास आणून दिले होते.

तरीही रस्त्यालगत नाल्या करण्यात आलेल्या नाहीत. यावर कंत्राटदाराकडून उडवाउडवीची उत्तरे दिली जात आहेत. अंत्रीकोळी शिवारात गट नंबर २३, २४, व २५ मधील शेतकऱ्यांच्या शेतीपिकांचे नुकसान झाले आहे.

आंदोलनाचा इशारा

या प्रकरणी संबंधित कंत्राटदाराला काळ्यात यादीत टाकावे, संपूर्ण रस्त्याचे स्थळ पंचनामे करून निकृष्ट दर्जाच्या कामाचा अहवाल तयार करावा, शेतकऱ्यांना मागील वर्षाच्या उत्पन्नावरून नुकसानभरपाई द्यावी, जबाबदार अधिकाऱ्यांवर कारवाई करून नुकसान भरपाईसाठी सार्वजनिक बांधकाम विभागाला जबाबदार धरावे, असे निवेदनात म्हटले आहे. नुकसानभरपाई न मिळाल्यास तीव्र आंदोलन छेडण्याचा इशारा देण्यात आला आहे.