Market Bulletin:

गाजराला उठाव 

बाजारात सध्या गाजराला उठाव मिळत आहे. बाजारातील आवक मात्र कमी झाली आहे. मे महिन्यातील पावसाने राज्यातील अनेक भागात पिकाचे नुकसान झाले. यामुळे आवक कमी असल्याचे शेतकरी सांगत आहेत. याचा आधार दराला मिळत आहे. सध्या बाजारात गाजर प्रतिक्विंटल सरासरी २ हजार ते २ हजार ५०० रुपयांच्या दरम्यान विकले जात आहे. पिकाचे नुकसान झाल्याने पुढील काही आठवडे बाजारातील आवकही कमीच राहण्याची शक्यता आहे. त्यामुळे गाजराचे दरही टिकून राहतील, असा अंदाज व्यापारी व्यक्त करत आहेत.

लसूण बाजार टिकून

लसणाच्या बाजारात मागील काही दिवसांपासून सुधारणा दिसून आली. बाजारतील लसणाची आवक वाढलेल्या पावासामुळे कमी झाली होती. मात्र लग्नसराई आणि समारंभामुळे लसणाला उठाव चांगला होता. त्यामुळे लसणाच्या भावात दोन आठवड्यांमध्ये सरासरी ५०० ते १ हजार रुपयांची वाढ दिसून आली. लसणाचे भाव राज्यातील बहुतांशी बाजारांमध्ये सध्या ७ हजार ते ८ हजार रुपये प्रतिक्विंटलच्या दरम्यान होते. लसणाची बाजारातील आवक पुढील काही आठवडे कायम राहू शकते. तसेच त्यानंतर आवक कमी होण्याची शक्यता आहे. त्यामुळे दरातही सुधारणा होऊ शकते, असा अंदाज व्यापारी व्यक्त करत आहेत.

शेवगा  तेजीतच

बाजारातील शेवग्याची आवक कमीच आहे. त्यामुळे शेवग्याचे भावही तेजीतच आहेत. शेवगा पिकाला यंदा पाऊस आणि बदलत्या वातावरणाचा मोठा तडाखा बसला. त्यामुळे शेवग्याची आवक कमी आणि उठाव चांगला अशी परिस्थिती आहे. त्यामुळे शेवग्याचे भाव तेजीत आहेत. शेवगा आजही ५ हजार ते ६ हजार रुपये प्रतिक्विंटलच्या दरम्यान विकला गेला. शेवग्याची बाजारातील आवक पुढील काळातही कमीच राहण्याचा अंदाज आहे. तर मागणीह टिकून राहील. त्यामुळे शेवग्याचे भाव तेजीतच राहू शकतात, असा अंदाज व्यापारी व्यक्त करत आहेत.

बटाटा आवक स्थिर

देशात यंदा बटाटा उत्पादन चांगले झाले. देशातील महत्वाच्या बटाटा उत्पादक उत्तर प्रदेश आणि पश्चिम बंगालमध्ये उत्पादन वाढल्याचे शेतकरी सांगत आहेत. त्यामुळे बाजारातील बटाटा आवकही चांगली आहे. परिणामी बटाट्याचे दर दबावातच आहेत. बटाट्याला सध्या प्रतिक्विंटल सरासरी १५०० ते २ हजार रुपयांच्या दरम्यान भाव मिळत आहे. पुढील काळातही बटाटा आवक चांगली राहण्याची शक्यता आहे. त्यामुळे बटाट्याचे भावही स्थिर राहू शकतात, असा अंदाज जाणकारांनी व्यक्त केला. 

लिंबाचे दर नरमले

लिंबाची बाजारातील आवक सुरळीत आहे. मात्र लिंबाला उठाव कमी झाला. त्यामुळे लिंबाचे भावही कमी झाले. मे महिन्यापर्यंत कडक उन्हामुळे लिंबाचे भाव तेजीत होते. पण पाऊस सुरु झाल्यानंतर दरात नरमाई येत गेली. सध्या लिंबू ३ हजार ते ४ हजार रुपयाने विकले जात आहे. मागील महीनाभरातच लिंबाचे भाव क्विंटलमागे १ ते २ हजाराने कमी झाले आहेत. बाजारातील आवक मर्यादीतच आहे. आवकेत फार वाढ झालेली नाही. मात्र तरीही भाव कमी झाले आहेत. लिंबू बाजारातील ही स्थिती आणखी काही आठवडे राहू शकते, असा अंदाज व्यापारी व्यक्त करत आहेत.