Buldana News : स्थानिक कृषी उत्पन्न बाजार समितीमध्ये मका सरासरी २०८० रुपये प्रतिक्विंटल दराने विकत आहे. या बाजार समितीत मक्याची आवक सुधारली आहे. दीड हजार क्विंटलपेक्षा अधिक आवक सध्या होत आहे.

विदर्भ, मराठवाडा व खानदेशच्या सीमेवर असलेल्या या बाजार समितीत मक्याची दरवर्षी मोठी उलाढाल होत असते. गेल्या काही काळापासून मक्याच्या लागवडीवर विपरीत परिणाम झालेला असल्याने आवकेवर परिणाम झालेला होता.

यंदाच्या हंगामातील मका तयार झाला असून तो विक्रीला येत आहे. या बाजार समितीत मक्याला कमाल २१३० रुपये दर मिळाला तर किमान १८०० रुपयांपर्यंत दर मिळत आहे. बाजारात प्रामुख्याने २०८० रुपयाचा सरासरी भाव अधिक मालाला मिळत आहे.

मक्याची परराज्यात पाठवणूक

मलकापूर बाजार समितीमध्ये खरेदी झालेला मका परराज्यात पाठविला जातो. तसेच देशभरातील व्यापारी या बाजारपेठेत खरेदीकडे लक्ष ठेवून असतात.

मक्याचा विविध क्षेत्रात वापर होत असल्याने येथील मक्याला चांगली मागणी राहते. विदर्भात ही बाजार समिती मक्याच्या उलाढालीसाठी प्रसिद्ध आहे.