जळगाव ः खानदेशात उडदाला फुले व हव्या तशा शेंगा (Urad Pods) न लागल्याच्या तक्रारी मागील १० दिवसांपासून सुरूच आहेत. अशातच शेंगांमधील दाणेच पक्व होत नसल्याने उडदावर शेतकरी रोटाव्हेटर (Urad Crop Demolish By Farmer) फिरवीत आहेत. यामुळे शेतकऱ्यांचे नुकसान झाले आहे. कृषी विभाग (Agriculture Department) मात्र या बाबत अनभिज्ञ आहे.

कुठलीही पाहणी, पंचनामे कृषी विभागाने याबाबत केलेली नाही. खानदेशात जळगावात सुमारे १७ हजार हेक्टरवर, धुळ्यात पाच हजार आणि नंदुरबारातही सुमारे चार हजार हेक्टरवर उडदाची पेरणी झाली होती. सुरुवातीला पाऊस बरा होता. यामुळे पीक जोमात होते. नंतर सततच्या पावसाने पिकात तण वाढले. ते कसेबसे शेतकऱ्यांनी नियंत्रित केले. त्यासाठी एकरी चार ते पाच हजार रुपये खर्च लागला. फवारण्या दोनदा घेतल्या. फुले काही भागात लगडत होती. परंतु शेंगांची वाढच हवी तशी झाली नाही. जेथे शेंगा लागल्या, तेथे त्यात दाणेच भरले नाहीत. ही समस्या शेतकऱ्यांनी लोकप्रतिनिधींना सांगितली. पण कुणी दखल घेतली नाही. गावोगावी कृषी सहायक व इतर यंत्रणा फिरते, पण त्यांनीदेखील गांभीर्याने या बाबत आवश्यक कार्यवाही केलेली नाही. पिकात कुठलेही उत्पादन दिसत नसल्याने धुळे, जळगाव व नंदुरबारात शेतकरी त्यावर रोटाव्हेटर फिरवीत आहेत. सुमारे पाच ते सात हजार हेक्टरवरील उडदाचे पीक रोटाव्हेटर करून क्षेत्र रिकामे करण्यात आले आहे.

जळगाव तालुक्यात खेडी खुर्द, वडनगरी, फुपनगरी, ममुराबाद, कडगाव, भादली, आसोदा, सुजदे, विदगाव, धामणगाव, शिंदखेड्यातील मुडावद, तावखेडा, टाकरखेडा, धुळे तालुक्यातील लामकानी, कुसुंबा, तामसवाडी, धनूर शिरपुरातील तऱ्हाडी, बभळाज, तरडी, नंदुरबार तालुक्यातील लहान शहादे, खोंडामळी, शहाद्यातील पुसनद, जयनगर, मामाचे मोहिदे, तोरखेडा, सारंगखेडा अशा अनेक गावांत उडदाला शेंगा न लागल्याच्या व शेंगांमधील दाणे पक्व न झाल्याच्या तक्रारी आहेत. या भागात पंचनामे करण्याची मागणी केली जात आहे. कारण मोठा खर्च केला, पण तो वाया गेला. आणखी त्यातच रोटाव्हेटरसाठी नव्याने खर्च करावा लागत आहे. रोटाव्हेटर करून त्यात पुढे आगाप दादर ज्वारी, हरभरा, मका आदी पिके घेण्याचे नियोजन शेतकऱ्यांनी केले आहे.