Sangli News : गणेशोत्सवात पूजेसाठी खाऊच्या पानांना मागणी असून उठावही होतो. त्यामुळे पानांच्या बाजारपेठांत खाऊच्या पानांची मागणी वाढली आहे. मागील पंधरा दिवसांपेक्षा गेल्या चार दिवसांत पानांच्या दरात प्रति डागाला १००० ते २००० हजार रुपयांनी सुधारणा झाली आहे. त्यामुळे पान उत्पादक शेतकऱ्यांना काहीसा दिलासा मिळाला असून दर टिकून राहण्याची शक्यताही शेतकऱ्यांनी वर्तवली आहे. सध्या खाऊच्या पानाला प्रतिडाग ४००० ते ६००० हजार रुपये दर मिळत आहे.

सांगली जिल्ह्यातील मिरज पूर्व भागातील पानांची विक्री जूनपासून वाढली. या दरम्यान, पानांचा चांगली मागणी असल्याने उठावही झाला असल्याने दरही अपेक्षित दर मिळाले होते. त्यानंतर जुलैच्या मध्यापर्यंत पानांचे दर टिकून असल्याने पान उत्पादक शेतकऱ्यांनी घातलेला पैसा पदरी पडेल अशी आशा होती. मात्र जून आणि जुलैमध्ये अतिवृष्टी झाली. त्याचा फटका पान मळ्यांना बसला. परिणामी उत्पादनात ४० टक्क्यांनी घट आली.

श्रावणात पुजेसाठी खाऊच्या पानांना सर्वाधिक मागणी असते. त्यानुसार पानांच्या विक्रीचे नियोजन शेतकरी करत असतो. परंतु पानांच्या बाजारपेठेत श्रावणात पानांची मागणी कमी झाली. याचा परिणाम दरावर झाल्याने श्रावणात सुमारे ४० टक्क्यांनी दरात घट झाली होती. परिणामी पान उत्पादक शेतकरी हतबल झाला होता.

गुजरात, मुंबई, पुणे, नाशिक, रत्नागिरी, लातूर, सोलापूर, सिंधूदुर्ग, खेड, दापोली, कोल्हापूर या पानांच्या बाजारपेठेत पानांची आवक कमी अधिक होती. परंतु उठाव कमी होता. त्यामुळे ऑगस्टमध्ये पानांचे दर दबावात होते. गेल्या पंधरा दिवसापूर्वी कळी पानाला २००० ते ३००० डाग (एका डागात १२ हजार पाने) असा दर होता.

गणेशोत्सवात पुजेसाठी पानांना मागणी असल्याने सांगली जिल्ह्यातून सुमारे १० ते १५ हजार डप्पा (एका डप्प्यात ३ हजार पाने) पानांच्या बाजारपेठेत विक्रीला जाऊ लागले आहेत. पानांच्या आवकेत वाढ झाली असली तरी, उठावही असल्यामुळे चार दिवसांपूर्वी पानांच्या दरात वाढ झाली आहे. सध्या कळी पानाला ४००० ते ५००० तर फापडा पानाला ५००० ते ६००० (एका डागात १२ हजार पाने) असा दर मिळत आहे. पंधरा दिवसांपेक्षा सद्यःस्थितीला दरात १००० ते २००० रुपयांनी वाढ झाल्याने पान उत्पादक शेतकऱ्यांना दिलासा मिळाला आहे.