Jalgaon News : केळी, भरीत वांगी आणि कापूस आणि ड्रीप-पाईपसह शुद्ध सोन्यासाठी प्रसिद्ध असलेल्या जळगावच्या सुवर्ण बाजारात सोने दराने पुन्हा ६३००० हजार रुपये प्रतितोळ्याचा (१० ग्रॅम) टप्पा गाठला आहे. तर चांदीचा दर प्रतिकिलो ७६००० रुपयांवर पोहोचला आहे.

डिसेंबरच्या अखेरपासून सोने दरात वाढ सुरू आहे. मध्यंतरी दर काहीसे कमी झाले होते. परंतु त्यात दर महिन्याच्या शेवटच्या आठवड्यात वाढ होत असल्याचे दिसत आहे. या महिन्यात सोने-चांदी दरात फारशी वाढ नव्हती. सोने दरात एक तोळ्यामागे २२०० रुपयांनी तर चांदी दरात एक किलोमागे ४४०० रुपयांनी घट झाली होती.

तसेच मागील आठवड्याभरात सोने एक तोळ्यामागे शंभर रुपयांनी स्वस्त झाले आहे. चांदी दरात एक किलोमागे १००० रुपयांनी वाढ झाली आहे. लग्नसराईचा कालावधी सुरू असल्याने सोने दरात घसरण होईल, अशी अपेक्षा ग्राहकांना आहे. परंतु सोने दर ६३ हजार रुपये प्रतितोळ्यावर स्थिर आहेत.

मागील आठवड्यात २४ आणि २५ जानेवारी रोजी सोने दरात एक तोळ्यामागे ५० रुपयांची घट दिसली. २६ जानेवारी रोजी मात्र सकाळी दरवाढ झाली आणि संध्याकाळी लागलीच दरात एक तोळ्यामागे १०० रुपयांची घसरण झाली. बाजारात सध्या २२ कॅरेट सोन्याचा दर प्रतितोळा ५७,८५० रुपये तर २४ कॅरेट सोन्याचा दर ६३,१०० रुपये प्रतितोळा आहे.

चांदीचा दरात वाढीचा कल

जानेवारीत चांदी दरात मोठी वाढ झाली नाही. गत आठवड्यात चांदी दरात काहीशी घसरण झाली. २३ जानेवारी रोजी चांदी दर एक किलोमागे ५०० रुपयांनी घटले. २४ जानेवारीला दरात ३०० रुपयांची सुधारणा झाली.

२५ जानेवारी रोजी चांदीदर एक किलोमागे ७०० रुपयांनी वधारले, २६ जानेवारी रोजी दरात पुन्हा चढउतार झाला नाही. परंतु मागील आठवड्यातील काही दिवसांत चांदी दरात एक किलोमागे १००० रुपयांनी सुधारणा झाल्याची माहिती मिळाली.