Nagpur News : शेतीमाल विक्रीची प्रक्रिया सुलभ होण्यात योगदान देणाऱ्या ई-बाजार व्यवस्थेला मध्य प्रदेश सरकारकडून प्रोत्साहन दिले जात आहे. त्याच प्रयत्नाअंतर्गत एक जानेवारीपासून ४१ बाजार समित्यांमध्ये नव्याने ई-बाजार प्रणाली लागू केली जाणार आहे. यापूर्वी ४२ बाजार समित्यांमध्ये ही प्रणाली असल्याने ई-बाजार प्रणाली असलेल्या राज्यातील एकूण बाजार समित्यांची संख्या ८३ वर पोहोचणार आहे.

शेतीमालाच्या हमीभावाने खरेदीला प्रोत्साहन, दुबार, तिबार तसेच व्यावसायिक पीकपद्धतीला प्रोत्साहन मिळावे याकरिता सिंचन सुविधा वाढविण्यावर भर यासह इतर अनेक उपाययोजना राज्य सरकारकडून शेतकरी हिताच्या दृष्टीने राबविल्या जात आहेत. त्यामुळे मध्यप्रदेशने शेतकऱ्यांसाठी कल्याणकारी राज्य म्हणून ओळख निर्माण केली आहे.

ही ओळख कायम ठेवत राज्यात येत्या काळात शेतमाल विक्रीसाठी पूरक अशा ई-बाजार व्यवस्थेला प्रोत्साहन दिले जाणार आहे. राज्यात सध्या ४२ बाजार समित्यांमध्ये ई-बाजार च्या माध्यमातून ऑनलाइन खरेदी विक्रीची व्यवस्था आहे. एक जानेवारीपासून त्यात नव्या ४१ बाजार समित्यांची भर पडेल.

त्या माध्यमातून सुमारे ८३ बाजारात ही व्यवस्था उभी राहणार आहे. त्यानंतर टप्याटप्याने राज्यातील सर्वच बाजार समित्यांना या कक्षेत आणले जाणार असल्याचे सूत्रांनी सांगितले. राज्यात सध्या २५९ बाजार समित्या असून एप्रिल २०२५ पर्यंत त्यांना ई-बाजाराच्या कक्षेत आणले जाणार आहे. त्या पार्श्‍वभूमीवर बाजार समित्यांमधील मापाऱ्यांना देखील या संदर्भाने प्रशिक्षण देण्यात आले आहे.

सर्व प्रक्रिया ऑनलाइन, ॲपमधून

ई-बाजार संकल्पनेत शेतकऱ्यांना बाजारात नोंदणी करण्यापासून ते लिलाव प्रक्रिया आणि खात्यात पैसे हस्तांतरण होईपर्यंची सारी प्रक्रिया ऑनलाइन व ॲपच्या माध्यमातून पार पाडली जाते. त्यामुळे शेतकऱ्यांना नोंदणीकरिता तासनतास रांगेत लागण्याची गरज पडत नाही. त्याकरिता बाजार समित्यांना देखील हायटेक करण्यावर भर देण्यात आला आहे. शेतमाल विक्री करणाऱ्या शेतकऱ्यांसाठी खास ॲप विकसित करण्यात आला असून त्यावर एकदाच नोंदणी करावी लागते.