Cotton Market Update Jalgaon : खानदेशात रोज ४० हजार क्विंटल कापसाची म्हणजेच आठ हजार गाठींएवढ्या (Cotton Production) (एक गाठ १७० किलो रुई) कापसाची आवक (Cotton Arrival) होत आहे. ही आवक मागील महिन्याच्या तुलनेत दीड पट आहे. खेडा खरेदीत प्रतिक्विंटल दर ७५०० ते ७६०० रुपये मिळत आहे.

मागील महिन्यात प्रतिदिन सरासरी सहा हजार कापूस गाठींची म्हणजेच ३० हजार क्विंटल कापसाची आवक होत होती. ही आवक पुढे आणखी वाढणार आहे.

जळगाव जिल्ह्यातील जामनेर, पारोळा, अमळनेर, पाचोरा, भडगाव, चाळीसगाव, चोपडा भागांत आवक बऱ्यापैकी आहे. पण जळगाव, यावल, मुक्ताईनगर, बोदवड भागांत आवक कमी आहे. रावेरात फारसे कापूस पीक नसते.

तसेच यावलमध्येही कापूस लागवड कमी असते. यामुळे या भागात आवक कमीच राहील, असे दिसत आहे. धुळ्यातील शिरपूर तालुक्यात ७५ टक्के कापसाची विक्री पूर्ण झाली आहे. तसेच धुळे व शिंदखेडा तालुक्यांतही ७० टक्के कापसाची विक्री शेतकऱ्यांकडून पूर्ण झाली आहे.

नंदुरबारात शहादा व तळोदा तालुक्यांतही ८० टक्के कापसाची विक्री पूर्ण झाली आहे. जळगाव जिल्ह्यातील आवक या महिन्यात अधिक सुरू झाली आहे. धुळे व नंदुरबारात नोव्हेंबर व डिसेंबरमध्ये अनेकांनी कापूस विक्री केली.

खरेदीसाठी गुजरात, मध्य प्रदेशातील खरेदीदार येत आहेत. एजंटच्या मदतीने कापूस खरेदी सुरू असून, खेडा खरेदीला वेग आला आहे. धरणगाव (जि. जळगाव) येथील सर्वच जिनिंग प्रेसिंग कारखाने जोमात सुरू आहेत.

तसेच जामनेर व जळगावमध्येही कापूस प्रक्रियेला वेग आला आहे. दर्जेदार किंवा चांगला कापूस बाजारात येत आहे. दर प्रतिक्विंटल ७५०० ते ७६०० रुपये, असा खेडा खरेदीत मिळत आहे. कारखानदार थेट किंवा खेडा खरेदी करीत आहेत.