Jalgaon News : खानदेशात खेडा खरेदीत कापूसदर नीचांकी स्थितीत पोहोचले असून, बुधवारी (ता. १९) व गुरुवारी (ता. २०) ६००० ते ६२०० रुपये प्रतिक्विंटल या दरात अनेक गावांत कापसाची खरेदी करण्यात आली.

कापूस दर मागील महिनाभरापासून हमीभावापेक्षा कमी आहेत. सुमारे १५ ते २० टक्के शेतकऱ्यांचा कापूस घरातच पडून आहे.

त्याला नीचांकी दर असल्याने शेतकऱ्यांमध्ये चिंता आहे. हमीभाव लांब धाग्याच्या कापसासाठी ७०२० रुपये प्रतिक्विंटलचा जाहीर झाला आहे. परंतु एवढा दर खानदेशात कुठेही नाही. कापसाची आवक बाजारात नगण्य आहे.

अनेकांनी मे व जूनमध्ये ६८०० ते ७००० रुपये प्रतिक्विंटल या दरात कापसाची विक्री टाळली होती. दरात सुधारणा होईल अशी अपेक्षा शेतकऱ्यांना होती. परंतु दरात सुधारणा झाली नाही. यामुळे हानी वाढली आहे. कापसाची आवक कमी असल्याने खेडा खरेदीदेखील वेगात किंवा जोमात नसल्याचे चित्र आहे.

जिनिंग उद्योगातील काम रखडत

खानदेशात काही अद्ययावत, आधुनिक जिनिंग प्रेसिंग कारखान्यांत कापसावर प्रक्रिया सुरू आहे. परंतु ही प्रक्रिया रखडत सुरू आहे. तसेच अनेक कारखान्यांत कापसाचा साठा नसल्याने कारखाने बंद आहेत.

खानदेशात २०२२-२३ मध्ये २२ लाख कापूसगाठींची (एक गाठ १७० किलो रुई) निर्मिती अपेक्षित होती. परंतु सुमारे १७ लाख कापूसगाठींची निर्मिती झाली आहे. सध्या १५ कारखान्यांत प्रक्रिया सुरू आहे, अशी माहिती मिळाली.