Nagpur News लहान शेतकऱ्यांनी त्यांच्याकडील कापसाची विक्री (Cotton Sale) केली असली तरी मध्यम आणि मोठ्या कापूस उत्पादकांकडील साठा (Cotton Stock) कायम आहे. एप्रिल-मेपर्यंत यातील बहुतांशी साठा बाजारात येण्याची शक्यता आहे. दहा टक्के साठ्याची विक्री पुढील हंगामात होईल, असे कापूस क्षेत्रातील जाणकारांनी सांगितले.

कॉटन असोसिएशन ऑफ इंडियाने यंदाच्या कापूस गाठी उत्पादन अंदाजात सातत्याने बदलाचे धोरण अवलंबिले. आता नव्या अंदाजानुसार देशात ३१३ कापूस गाठींच्या उत्पादनाचा अंदाज वर्तविण्यात आला आहे.

२८ फेब्रुवारीपर्यंत त्यातील १५५ लाख गाठींची आवक नोंदविण्यात आली. दरवर्षी फेब्रुवारीपर्यंत ७५ टक्के कापसाची आवक होते. यंदा मात्र हे प्रमाण ५० टक्क्यांपर्यंतच मर्यादित राहिले. त्यामागे दरवाढीची अपेक्षा हे कारण सांगितले जाते.

या वर्षी कापसाला अपेक्षित दर न मिळाल्याने भारतात कापूस लागवड दहा ते पंधरा टक्के कमी होण्याचा अंदाज असून, अमेरिकेत सुद्धा कापसाखालील क्षेत्र १५ ते २० टक्क्यांनी घटण्याचे संकेत आहेत. भारतीय बाजारात १५ मे पर्यंत कापसाची चांगली आवक होण्याचा अंदाज आहे.

राज्यात ३० टक्के कापूस शिल्लक

महाराष्ट्राचा विचार करता यंदा ७० लाख कापूस गाठींच्या (३५० लाख क्विंटल) उत्पादकतेची शक्यता आहे. यातील २०० लाख क्विंटल कापूस म्हणजे ४० लाख गाठी बाजारात आल्या आहेत. सुमारे ३० टक्के कापूस शिल्लक असल्याचे सांगितले जाते. दरम्यान, अकोला जिल्ह्यातील अकोट बाजार समितीत कापसाला ८२०० ते ८४०० रुपयांचा दर मिळाला.