Jalgaon News : खानदेशात केळी दरात घसरण सुरूच आहे. किमान दर ८०० व कमाल दर १६०० रुपये प्रतिक्विंटल, असे आहेत. केळीची आवक कमी आहे. परंतु उत्तरेकडे थंडी, पाऊस आदी कारणांनी केळीची मागणी घटली आहे. यामुळे केळी दरातील वाढ थांबली आहे.

केळीची आवक अजूनही नीचांकी स्थितीत आहे. सध्या केळीची रोज ३० ते ३५ ट्रक (एक ट्रक १६ टन क्षमता) केळीची आवक खानदेशात होत आहे. आवकेत कोणतीही वाढ मागील १० ते १२ दिवसांत झालेली नाही. थंडी व प्रतिकूल स्थितीमुळे केळी पक्व होण्याची क्रियाही संथ आहे. यामुळे केळी आवक कमी आहे.

परंतु दर्जेदार केळीस किंवा निर्यातीच्या केळीचे दर १६०० ते १७०० रुपये प्रतिक्विंटल, असे आहेत. तर कमी दर्जाच्या केळीचे दर ८०० ते ११०० रुपये प्रतिक्विंटल, असे आहेत. पंजाब, राजस्थान, काश्मीर भागातील काही खरेदीदार दर्जेदार केळीचा पुरवठा खानदेशातील एजंटच्या मदतीने करून घेत आहेत.

परंतु ही मागणी ऑक्टोबरच्या तुलनेत अल्प आहे. रोज सात ते आठ ट्रक केळी उत्तरेकडे खानदेशातून पाठविली जात आहे. स्थानिक बाजारातही केळीची मागणी कमी आहे. यामुळे केळीची मागणी व पुरवठा याचे गणित बिघडले आहे.

मध्य प्रदेशातील बऱ्हाणपूर येथील बाजारातही केळीची आवक कमी आहे. परंतु तेथेही दर कमीच आहेत. तेथे किमान ७०० व कमाल ११०० रुपये प्रतिक्विंटल केळीस दर आहे. सध्या जळगावातील यावल, रावेर, चोपडा आदी सर्वच भागांत केळीची आवक कमी आहे. आवक फेब्रुवारीत वाढेल, असे संकेत आहेत.