Jalgaon News : मध्य प्रदेशातील बाजारात केळीच्या आवकेत मोठी वाढ झाल्याने खानदेशात शिवार किंवा थेट खरेदीत केळी दरात मागील १२ ते १५ दिवसांत एक क्विंटलमागे ११०० ते १००० रुपयांची घट झाली आहे.

मध्य प्रदेशातील बऱ्हाणपूर येथील बाजारात लिलावामध्ये जे दर केळीस मिळतात, त्याच दरात खानदेशात केळीची शिवार किंवा थेट खरेदी केली जाते. बऱ्हाणपुरात केळीची आवक सतत वाढत आहे. तेथील आवक २२७ ट्रकपर्यंत (एक ट्रक १६ टन क्षमता) मागील शनिवारी (ता. २८) पोहोचली होती. ही आवक मागील पंधरवड्यात ११० ते १२० ट्रक प्रतिदिन अशी होती. खानदेशात केळी आवकेत फारशी वाढ झालेली नाही. परंतु नजीकच्या राज्यातील बाजारात केळीची आवक वाढल्याने त्याचा परिणाम खानदेशात केळी दरांवर सतत होत आहे.

खानदेशात १५ ते १६ दिवसांपूर्वी दर्जेदार किंवा निर्यातक्षम केळीचा दर कमाल ३३६१ रुपये प्रतिक्विंटल होता. परंतु सध्या निर्यातक्षम केळीचा दर २३०० ते २४०० रुपये प्रतिक्विंटल, असा शिवार खरेदीत आहे. तर कमी दर्जाच्या केळीचे दर १५०० ते २००० रुपये प्रतिक्विंटल, असे आहेत. गणेशोत्सव काळात राज्यातही केळीस मोठा उठाव होता.

यामुळे नवी मुंबई, ठाणे, कल्याण आदी भागांतही केळीची पाठवणूक बऱ्यापैकी होती. खानदेशात सध्या रोज ७० ते ८० ट्रक (एक ट्रक १६ टन क्षमता) केळीची आवक होत आहे. अनेक भागांत कांदेबाग केळीची काढणी ७० ते ८० टक्के पूर्ण झाली आहे. पुढील आठवड्यात आवक कमी होईल, अशी स्थिती आहे.

दर्जेदार केळी जळगावातील चोपडा, चाळीसगाव, भडगाव, पाचोरा, जामनेर, जळगाव, यावल आदी भागांत आहेत. रावेर, मुक्ताईनगरात केळीची आवक फारशी नाही. पुढे खानदेशात केळी आवक आणखी कमी होईल, अशी स्थिती आहे.