Tur Market Update हिंगोली कृषी उत्पन्न बाजार समिती अंतर्गत धान्य बाजारात (भुसार माल) सोमवार (ता.१७) ते शुक्रवार (ता.२१) या कालावधीत तुरीची (Tur Arrival) क्विंटल ११९१ आवक झाली. त्यास प्रतिक्विंटल किमान ७८०० ते कमाल ८७९५ रुपये तर सरासरी ८२९८ रुपये दर मिळाले.

शुक्रवारी (ता.२१) तुरीची ६८६ क्विंटल आवक झाली. त्यास प्रतिक्विंटल किमान ८२६५ ते कमाल ८७९५ रुपये तर सरासरी ८५३० रुपये दर मिळाले. बुधवारी (ता.१९) १६० क्विंटल आवक होऊन प्रतिक्विंटल किमान ८०८० ते कमाल ८५८५ रुपये तर सरासरी ८३३२ रुपये दर मिळाले.

मंगळवारी (ता.१८) तुरीची १९० क्विंटल आवक होऊन प्रतिक्विंटल ८००५ ते कमाल ८५६० रुपये तर सरासरी ८२८२ रुपये दर मिळाले. सोमवारी (ता.१७) तुरीची १५५ क्विंटल आवक होऊन प्रतिक्विंटल किमान ७८०० ते कमाल ८३२५ रुपये तर सरासरी ८०६२ रुपये दर मिळाले.

एप्रिलमध्ये दरात ७५ ते ३४५ रुपयांनी वाढ

‘‘तुरीची सध्या स्थानिक परिसरातून आवक होत आहे. यंदा जिल्ह्यात तुरीच्या उत्पादकतेत घट झाली आहे. त्यामुळे गतवर्षीच्या तुलनेत आवक कमी आहे. त्यामुळे दरात तेजी आहे.

गेल्या महिन्याच्या तुलनेत या महिन्यात तुरीच्या कमाल दरात ७५ ते ३४५ रुपयांनी वाढ झाली आहे. त्यामुळे आवक वाढली आहे,’’ असे हिंगोली कृषी उत्पन्न बाजार समितीचे सचिव नारायण पाटील यांनी सांगितले.