Akola News : एकीकडे हरभरा डाळीची मागणी वाढली असल्याचे संकेत असतानाच दुसरीकडे बाजार समित्यांमध्ये हरभऱ्याचा दर मात्र फारसा बदललेला नाही. अकोला बाजार समितीत शुक्रवारी (ता. १) त्यास सरासरी ५३०० रुपये प्रतिक्विंटल दर मिळाला. तर ४४७ पोत्यांची आवक झाली. या बाजारात हरभऱ्याचा किमान दर आजही ४००० रुपये प्रतिक्विंटल इतका आहे. तर कमाल ६००५ रुपयांचा राहिला.

साधारण आठवडाभरापूर्वी म्हणजे २६ ऑगस्टला अकोल्यात हरभऱ्याचा दर ५२६० रुपये सरासरी होता. तेव्हा किमान दर ४९४५ व कमाल ५५९५ रुपये मिळाला होता. दोन दिवसांनी म्हणजेच २८ ऑगस्टला हाच सरासरी दर ५२०० रुपये मिळाला.

पुन्हा ३१ ऑगस्टला सरासरी दरात थोडी सुधारणा होऊन तो ५४०० झाला. शुक्रवारी (ता. १) १०० रुपयांनी सरासरी दर कमी होऊन ५३०० वर पोचला.

पश्‍चिम विदर्भात प्रमुख बाजारपेठांपैकी एक असलेल्या मलकापूर (जि. बुलडाणा) बाजार समितीत हरभरा सरासरी ५५७५ रुपयांनी विक्री झाला. कमाल ६१५४ रुपये दराने १२ क्विंटल हरभरा विकला.

या बाजारात २८ ऑगस्टला सरासरी दर ५१५१ रुपये होता. आता या दरात पाच दिवसांत थोडी सुधारणा होऊन ५५७५ पर्यंत पोचला. तरीही अपेक्षेप्रमाणे दरवाढ होत नसल्याचे सांगितले जात आहे.

अनेक शेतकऱ्यांनी दरवाढीच्या अपेक्षेने हरभरा साठविलेला आहे. दरवाढ झाल्यास हा हरभरा विक्रीस येऊ शकतो. पुढील महिन्यात रब्बी लागवडीला प्रारंभ होईल. पुढे पाऊस कसा राहतो, यावर रब्बी हरभरा लागवड अवलंबून आहे.