Yavatmal News : हवामानातील बदलाच्या परिणामी बाजारात लोणच्याच्या कैऱ्यांची आवक उशिरा सुरू झाली. आर्णी बाजारात देखील सद्यःस्थितीत लोणच्याकामी लागणाऱ्या कैऱ्यांची आवक वाढत आहे. त्यांना ५५ ते ६० रुपये किलोचा दर मिळत आहे.

शहरी भागात नाही, परंतु ग्रामीण भागात आजही कच्च्या कैरीची खरेदी करून त्यापासून लोणचे तयार करण्यावर भर दिला जातो. विकतच्या लोणच्यापेक्षा याची चव वेगळीच राहते. परिणामी घरच्याच लोणच्याला खवय्यांची देखील पसंती राहते, अशी स्थिती आहे.

सध्या आर्णी बाजारात लोणच्याकामी असलेल्या अस्सल गावरान कैऱ्यांची आवक होत आहे. ग्राहकांकडून देखील त्याला मागणी असून याला सरासरी ५५ ते ६० रुपये किलोचा दर मिळत आहे.

मोहरी, हळद, तेल, लसूण, मिरे, लवंग, मेथी, तीळ, हिंग या साऱ्या घटकांचा वापर लोणच्याकामी गृहिणींव्दारे केला जातो.

नंतर हे लोणचे चीनी माती किंवा काचेच्या बरणीत साठवले जाते. ग्रामीण भागात शिदोरीसह लोणचे दिले जाते. घरातील लहान मुलांसह सर्वांना या गावरान लोणच्याचे आकर्षण राहते.