लातूर ः कोरोनाचा गेले वर्षभर सर्वच घटकावर परिणाम झाला आहे. काही प्रमाणात शेतीवरही झाला आहे. पण शेतकऱ्यांनी मेहनत घेत पिके घेतली. निसर्गानेही साथ दिली. यातून मोठ्या प्रमाणात लातूर उच्चत्तम कृषी उत्पन्न बाजार समितीच्या अडत बाजारात वर्षभर शेतीमालाची आवक चांगली राहिली. मार्चअखेर या अडत बाजारात ४४ लाख ५८ हजार क्विंटल शेतीमालाची आवक राहिली. काही शेतीमालाला चांगला भाव मिळाल्याने चार पैसेही शेतकऱ्यांच्या पदरात पडले.

सोयाबीनने भाव खाल्ला

गेल्या वर्षी शेतकऱ्यांजवळचे सोयाबीन संपल्यानंतर भाव वधारले होते. अकरा हजारांपर्यंत भाव गेले होते. पण या वर्षी मात्र हंगाम सुरू झाल्यापासूनच सोयाबीनला चांगला भाव मिळत गेला. सरासरी सात हजार रुपये क्विंटल भाव राहिला. या वर्षी सोयाबीनचा पेरा मोठ्या प्रमाणात झाला होता. पण शेतकऱ्यांनी मात्र भाव वाढतील या अपेक्षेने सोयाबीन म्हणावे तसे बाजारात आणले नसल्याचे चित्र आहे. वर्षभरात १९ लाख क्विंटल सोयाबीनची आवक राहिली. उन्हाळी सोयाबीन निघाले तर भाव सात हजारांच्या घरातच राहिले.

लग्नसराईत आवक वाढली

दिवाळीच्या अगोदरच बाजारपेठेत शेतीमालाची आवक सुरू होते. या वर्षीही सुरू झाली पण लग्नसराईत मात्र शेतकऱ्यांनी मोठ्या प्रमाणात शेतमाल अडत बाजारात आणला. सोयाबीन, तूर, हरभरा, उडीद, मूग, गूळ, साळी, गहू, ज्वारी, बाजरी, मका, करडी, चिंच यांची आवक बाजारपेठेत राहिली. मार्चअखेर ४४ लाख ५८ हजार २४३ क्विंटल आवक राहिली. काहींना समाधानकारक तर काहींना हमीभावापेक्षा कमी भाव मिळाला.

तारण योजनेत २१ हजार क्विंटल सोयाबीन

बाजारपेठेत सोयाबीनला चांगला भाव आल्यानंतर शेतकऱ्यांनी आपले सोयाबीन विकावे या करीता लातूर बाजार समितीने शेतीमाल तारण योजना सुरू केली. शेतकऱ्यांच्या खिशात चार पैसे पडावे हा उद्देश आहे. यालाही शेतकऱ्यांनी प्रतिसाद दिला. ५५६ शेतकऱ्यांनी या योजनेत २१ हजार क्विंटल सोयाबीन ठेवले. यात बाजार समितीने त्यांना सहा टक्के दराने सहा कोटी ३२ लाख रुपये कर्जही दिले.