नागपूर : महाकृषी अभियानांतर्गत पंतप्रधान ‘कुसुम घटक’योजनेतून ५० हजार शेतकऱ्यांना सौरऊर्जेवरील कृषिपंपांसाठी अनुदान देण्यात येणार आहे. महाऊर्जाच्या ई-पोर्टलवर अर्ज केलेल्या शेतकऱ्यांना लाभार्थी हिस्सा भरण्यासाठी ३१ मेपर्यंत मुदतवाढ देण्यात आली आहे, अशी माहिती महाऊर्जाचे विभागीय महाव्यवस्थापक वैभवकुमार पाथोडे यांनी दिली.

सौरऊर्जेवरील कृषिपंपांसाठी सर्वसाधारण गटातील लाभार्थी शेतकऱ्यांना कृषिपंपांच्या किमतीच्या १० टक्के, तर अनुसूचित जाती व जमातीच्या लाभार्थ्यांना कृषिपंप किमतीच्या ५ टक्के लाभार्थी हिस्सा भरावयाचा आहे. सौर कृषिपंपांची उर्वरित रक्कम सर्वसाधारणसाठी ९० टक्के, तर अनुसूचित जातीच्या लाभार्थ्यांसाठी ९५ टक्के अनुदान स्वरूपात देण्यात येईल.

शेतकऱ्यांच्या जमीनधारणा क्षमतेनुसार तीन एचपी, पाच एचपी व ७.५ एचपी डीसी सौरपंप देण्यात येतील. अर्ज मंजूर झालेल्या शेतकऱ्यांनी आपल्या हिस्स्याची रक्कम ऑनलाइन अथवा एनईएफटी ट्रान्स्फरद्वारे भरायची आहे. तसेच भरणा केलेल्या रकमेचा यूसीआर क्रमांक असलेली कॉपी कुसुम पोर्टलवर अपलोड करावयाची आहे. यासंदर्भात अडचणी असल्यास महाऊर्जाच्या विभागीय कार्यालय दूरध्वनी क्रमांक ०७१२-२५३१६०२, २५६४२५६ संपर्क साधावा.