Akola News : या हंगामातील तुरीच्या काढणीला सुरवात झाली आहे. बाजारात नवीन तुरीची आवकही होत आहे. येथील बाजारात तूर किमान ६८०० पासून तर कमाल ९३२० रुपयांपर्यंत प्रतिक्विंटल रुपये दराने विकत आहे. शनिवारी (ता. ६) सरासरी ८५५० रुपयांचा दर मिळाला.

यंदाच्या खरिपात लागवड झालेल्या पहिल्या टप्प्यातील तुरीचे पीक शेतकऱ्यांच्या हातात येत आहे. बऱ्याच शेतकऱ्यांनी तुरीची काढणीही केली. हीच नवीन तूर बाजारात विक्रीला नेली जात आहे. तुरीच्या पिकावर मध्यंतरी कीडरोगांचा प्रादुर्भाव झाला होता. यामुळे उत्पादकतेला मोठा फटका बसला.

तुरीचे पीक मागील वर्षाच्या तुलनेत ५० टक्के कमी आहे, असे व्यापाऱ्यांकडून सांगितले जाते. त्यामुळेच मागील वर्षापेक्षा सध्याच्या काळात आवकही बरीच कमी होत आहे. असे असतानाही तुरीचे दर गेल्या काही दिवसांपासून दबावात आहेत. शासनाकडून परदेशातून तुरीची आयात सुरू असल्याने स्थानिक दरांवर परिणाम झालेला आहे, असे व्यापाऱ्यांकडून सांगण्यात आले.

नवीन तुरीची मळणी पुढील काही दिवसात आणखी वाढणार आहे. त्यामुळे तुरीची आवक वाढेल, असा अंदाज आहे. आवक वाढल्यानंतर तुरीचा दर नेमका काय राहील, हे सध्या सांगणे कठीण असल्याचे व्यापारी म्हणाले.

उत्पादन ५० टक्क्यांच्या आत

यंदाचे तुरीचे पीक सुरवातीला चांगले होते. वाढही झालेली दिसून येत होती. दरम्यान ऑगस्टमध्ये पडलेल्या खंडाचा परिणाम पिकावर झाला. नंतर फुलोरा व शेंगा पकडण्याच्या स्थितीत कीड रोगांमुळे नुकसान झाले. शिवाय काही भागात पीक उभे वाळले. शेंगामध्ये दाणे परिपक्व न झाल्याने एकरी उत्पादन कमी झाले.