हवामान अंदाजानूसार मराठवाड्यात दिनांक २ ते ८ नोव्हेंबर दरम्यान कमाल व किमान तापमान सरासरीएवढे राहण्याची शक्यता आहे. पाऊस सरासरीएवढा राहण्याची शक्यता आहे. हवामानानूसार फळे, भाजीपाला आणि रेशीम शेतीतील व्यवस्थापनाविषयी वसंतराव नाईक मराठवाडा कृषी विद्यापीठाने पुढील सल्ल्याची शिफारस केली आहे. 

- संत्रा, मोसंबी बागेत अंतरमशागतीची कामे करून तण नियंत्रण करावे. मृग बहार घेतलेल्या संत्रा, मोसंबी बागेत पानामध्ये अन्नद्रव्यांची कमतरता दिसून येत असल्यास फवारणी न केलेल्या बागेत चिलेटेड झिंक ५ ग्रॅम प्रति लिटर पाण्यात मिसळून फवारणी करावी. फळवाढीसाठी जिब्रॅलिक ॲसिड २ ग्रॅम प्रति १०० लिटर पाण्यात मिसळून फवारणी करावी. रोगग्रस्त फांद्या काढून नष्ट कराव्यात. 

- डाळिंब बागेत अंतरमशागतीची कामे करून तण नियंत्रण करावे. नविन फुटवे काढावेत. बागेतील पडलेली फळे गोळा करून व रोगग्रस्त फांद्या काढून नष्ट कराव्यात. काढणीस तयार असलेल्या चिकू फळांची काढणी करावी.

- पुनर्लागवडीसाठी तयार असलेल्या टोमॅटो, कांदा, कोबी भाजीपाला पिकांची पुनर्लागवड करावी. गाजर, मेथी, पालक इत्यादी पिकांची लागवड करावी. 

- मिरची पिकावर सध्या फुलकिडींचा प्रादूर्भाव दिसून येत आहे व्यवस्थापनासाठी ॲसिटामिप्रिड (२० % एस.पी.) १०० ग्रॅम किंवा इमामेक्टीन बेन्झोएट (५ % एस. जी.) २०० ग्रॅम प्रति हेक्टर फवारणी करावी. काढणीस तयार असलेल्या भाजीपाला पिकांची काढणी करून घ्यावी.

रेशीम शेती सल्ला

रेशीम किटक थंड रक्ताचा किटक असून संगोपनगृहातील तापमान २० अंश सेल्सिअस च्या खाली व ३५ अंश सेल्सिअसच्या वर गेले असता तुती पाने खात नाहीत. ढगाळ वातावरणात संगोपनगृहात तापमापी व ईलेक्ट्रॉनिक आर्द्रता यंत्र असणे गरजेचे आहे. तापमान व आर्द्रतेचा अंदाज न आल्यामूळे रेशीम किटकांमध्ये खडू, ग्रासरी किंवा फ्रॅचरी रोगाचा प्रादुर्भाव होण्याची शक्यता असते. दोन कोषाच्या पिकात ८ दिवसाचे अंतर ठेवावे. या काळात ब्लिचिंग पावडर २ टक्के व कळीचा चुना ०.३ टक्के या प्रमाणे १०० लिटर पाण्यात २०० ग्रॅम ब्लिचिंग पावडर व ३०० ग्रॅम चुना वापरावा.