पशुपालन व्यवसाय करत असताना तिन्ही ऋतूतील बदलानुसार व्यवस्थापनात बदल करणे गरजेचं ठरते. उन्हाळा सुरु झालाय, सध्या अनेक ठिकाणी उष्णतेच्या लाटेचे इशारा देण्यात आला आहे. अति उष्णतेमुळे माणसाप्रमाणे जनावरांमध्येही उन्हाळ्यात रक्तस्त्राव होत असतो. उन्हाळ्यात जनावरांची विशेष काळजी घ्यावी लागते. कारण उन्हाळ्यात जनावरांना हिट स्ट्रोक होण्याचा धोका सर्वाधिक असतो. याचा सरळ परिणाम हा दूध उत्पादनावर होत असतो.

उन्हाळ्यात जनावरांमध्ये दिसून येणारा रक्तस्त्राव हा संकरीत जनावरांमध्ये मोठ्या प्रमाणात असतो. यात जनावरांच्या नाकातून गडद लाल रंगाचे रक्त वाहते. उन्हाळ्यात जनावरांना पिण्याचे स्वच्छ, थंड पाणी द्यावे. नाकातून रक्तस्त्राव होत असल्यास डोक्यांवर थंड पाणी ओतावे. रक्तस्त्राव थांबत नसल्यास पशुवैद्यकाच्या सल्ल्याने जनावरांना जीवनसत्त्व-क आहारातून द्यावे.

सूर्याच्या प्रखर किरणामुळे जनावरे उष्माघाताला बळी पडण्याचे प्रमाण वाढते. उष्माघातामुळे जनावरांच्या शरीराची कातडी कोरडी पडते. खाद्य खाण्याचे प्रमाण कमी झाल्याने, जनावरे थकून जातात. दूध उत्पादनात घट दिसून येते. यावर उपाय म्हणून जनावरांच्या अंगावर थंड पाणी ओतावे. गोणपाट ओलसर करून जनावरांच्या डोक्यावर किंवा पाठीवर ठेवावे. गोठ्यातील तापमान नियंत्रित ठेवण्यासाठी विविध उपाययोजना कराव्यात. गोठ्यातील तापमान जास्त असल्यास जनावरांना मोकळ्या सावलीच्या जागी बांधावे. अशा ठिकाणी चाऱ्याची आणि पाण्याची सोय करावी.