Pune News : पावसाळ्याच्या तोंडावर राज्यातील विविध जिल्ह्यांमध्ये पशुधनाला विविध संसर्गाचा इशारा पशुसंवर्धन विभागाने दिला आहे. या इशाऱ्याच्या पार्श्‍वभूमीवर पशुसंवर्धन विभागाने लसीकरणाची मोहीम हाती घेतली असून, विविध जिल्ह्यांना पशुधनांना लसीकरण करण्याच्या सूचना दिल्या आहेत.

पावसाळ्यात विविध पशुधनांना घटसर्प, शेळ्या मेंढ्यांना देवी, फऱ्या, पीपीआर, लाळ्या खुरकूत आदी विविध रोगांची लागण होण्याचा धोका असतो. गेल्या दोन वर्षांत लम्पी स्कीनसारख्या रोगाने मोठ्या प्रमाणावर पशुधनांचा मृत्यू झाला होता. यंदाही लम्पी स्कीनसारख्या रोगाचा उद्रेक होण्याचा धोका केंद्र सरकारने वर्तविला आहे. या सर्व पार्श्‍वभूमीवर पशुसंवर्धन विभागाने विविध रोगांची लागण रोखण्यासाठी विविध लसीकरणाची मोहीम हाती घेतली आहे.

केंद्र सरकारच्या इशाऱ्यानंतर लम्पी स्कीनची बाधा रोखण्यासाठी राज्यात या हंगामात ५८ लाख ६३ हजार पशुधनाचे लसीकरण करण्यात आले आहे. लाळ्या खुरकूत रोखण्यासाठी लसीकरणाच्या चार फेऱ्यांमधून १ कोटी ८२ लाख पशुधनाला म्हणजेच ९३ टक्के पशुधनाला लसीकरण करण्यात आले आहे.

शेळ्या मेंढ्यांसाठी अत्‍यंत जीवघेणा असलेल्या पीपीआर प्रतिबंधक लसीकरणासाठी पुढील चार वर्षे सलग लसीकरण करण्यात येत आहे. यामध्ये पहिल्या फेरीमध्ये ९३ लाख ५७ लाख म्हणजेच ७० टक्के लसीकरण करण्यात आल्याचे पशुसंवर्धन विभागाकडून सांगण्यात आले.

गायी म्हशींमधील सांसर्गिक गर्भपात (ब्रुसेल्लोसिस) रोखण्यासाठी ४ ते ८ महिन्यांच्या कालवडी आणि म्हशींच्या पारड्यांना सुरू असलेल्या पहिल्या फेरीमध्ये १९ लाख ६१ हजार म्हणजेच ६८ टक्के लसीकरण पूर्ण करण्यात आले आहे. घटसर्फ व फऱ्याची लागण रोखण्यासाठी मॉन्सूनपूर्व लसीकरणामध्ये ३८ लाख म्हणजेच २० टक्के लसीकरण पूर्ण झाले असून, उर्वरित लसीकरण सुरू असल्याचे सांगण्यात आले.

‘लम्पी’ रोखण्यासाठी या करा उपाययोजना

- हा रोग बाह्यकीटक (डास, माश्‍या, गोचिड) यांच्यामुळे होत असल्याने त्यांच्यावर नियंत्रणासाठी गोठ्यांची स्वच्छता ठेवावी.

- निरोगी पशुधनाला बाधित पशुधनापासून विलगीकरण करून ठेवावे.

- गायी व म्हशींनी एकत्रित बांधू नये.

- पशुधन आजारी असल्याचे जाणवल्यास तातडीने पशुवैद्यकियांना दाखवून तातडीने उपचार करावेत.