अलिबाग : लम्पी स्कीन आजाराला रोखण्यासाठी तालुका पशुसंवर्धन (Animal Husbandry) विभागाकडून पावले उचलण्यात येत असून गावोगावी गुरांच्या लसीकरणाची (Lumpy Vaccination) मोहीम वेगाने सुरू आहे. चौलसह मल्याण, आंदोशी, बेलोशी अशा अनेक गावांमध्ये लसीकरण सुरू झाले आहे. पशुपालकांचा गुरांच्या लसीकरणाला प्रतिसाद मिळत असून स्वतःहून पुढाकार घेत लसीकरणावर भर दिला जात आहे.

अलिबाग तालुक्यात चौल परिसरात लम्पी स्कीन बाधित पशुधन आढळले आहे. प्रादुर्भाव वाढू नये यासाठी चौल परिसरात ५०० जनावरांचे लसीकरण करण्यात आले आहे. बेलोशी ग्रामपंचायतीचे सरपंच कृष्णा भोपी यांनी पुढाकार घेत ग्रामपंचायत कार्यालयाच्या आवारात लसीकरण मोहीम हाती घेतली आहे.

शनिवारी डॉ. सुहास जोशी, भगवान नाईक, बेलोशी ग्रामपंचायत सदस्य नंदकुमार काटले, भास्कर भोपी आदींसह असंख्य पशुपालक उपस्थित होते. मल्याण, आंदोशी, वावे, चौल अशा अनेक गावांमध्ये गुरांचे लसीकरण सुरू आहे. लम्पीचा परिणाम पशुधनावर होऊ नये, यासाठी पशुपालक उपाययोजना करीत आहेत.

पशुसंवर्धन विभागासह ग्रामपंचायतीकडूनही लम्‍पी स्कीनचा प्रादुर्भाव रोखण्याबाबत जनजागृती करण्यात येत आहे. यासाठी भित्तीपत्रके लावण्यात येत असून पशुअधिकाऱ्यांकडून तपासणीही सुरू आहे. लम्पी स्कीन आजाराबद्दल अनेकांना भीती वाटते. हा आजार इतर प्राण्यांमध्येही पसरण्याची शक्यता वाटते. यासंदर्भात जनजागृती होत आहे. मात्र खबरदारी म्हणून चिकन-मटण खाणे तात्पुरते बंद केले.

- बल्लेश सावंत, तरुण, पाली

लम्पी स्कीन हा फक्त आणि फक्त गाई, वासरे व बैल यांना होणारा आजार आहे. हा कोंबड्यांना किंवा माणसांना होणारा आजार नाही. त्यामुळे नागरिकांनी घाबरून जाऊ नये व अफवांवर विश्वास न ठेवता चिकन, मटण खावे,

दूधही बिनधास्त प्यावे आणि तंदुरुस्त राहावे. लम्‍पी स्कीनचा प्रादुर्भाव रोखण्यासाठी प्रतिबंधात्‍मक लसीकरण सुरू आहे.

- डॉ. प्रशांत कोकरे, पशुधन विकास अधिकारी, सुधागड