पोटॅशियम कमतरतेची कारणे-

· आजारी जनावरांनी अधिक काळ चारा न खाल्ल्यास अशा जनावरांमध्ये पोटॅशियमची कमतरता (potassium deficiency) जाणवते.

· काही आजारांमध्ये जनावरांच्या तोंडाला इजा झालेली असल्यास किंवा त्यांना वातावरणाचा किंवा इतर कोणताही ताण आलेला असेल तर जनावर चारा खात नाही परिणामी त्या जनावराला पोटॅशियमची कमतरता जाणवते.

· जनावरांमधील पचन संस्थेशी संबंधित आजार किंवा किडनीशी संबंधित आजारांमध्ये देखील जनावरांच्या शरीरात पोटॅशियमची कमतरता होते.

· गायीमध्ये अॅक्युट मस्टाटीसमध्ये देखील पोटॅशियमची कमतरता दिसून येते.

· अधिक दूध उत्पादन क्षमता असणाऱ्या गायीमध्ये विल्यानंतर पोटॅशियमची कमतरता दिसून येते.

पोटॅशियम कमतरतेची लक्षणे

· जनावराच्या मांसपेशी कमजोर होऊन जातात.

· जनावराच्या मांस पेशी चा थरकाप होऊ लागतो.

· गायीची अवघड प्रसूती करत असताना वासरू ओढून काढलेले असल्यास वासरू ओढल्यानंतर गायीच्या मांड्यांचा थरकाप होतो परिणामी गाय खाली बसते, उभी राहत नाही अशा वेळी तिला पोटॅशियमची कमतरता झालेली असते.

· विल्यानंतर गायीची वार बाहेर पडत नाही. अशा वेळेस वार पडण्याचे औषध देऊन देखील वार पडत नाही हा अनुभव अनेक पशुवैद्यकांनी घेतलेला आहे.

· जनावराच्या मानेच्या मांस पेशी कमजोर होतात त्यामुळे जनावर मान धरत नाही, मागच्या पायाच्या मांस पेशी कमजोर झाल्याने जनावर उभे राहत नाही.

उपचार

· पोटॅशियम शिरेमधून पशुवैद्यकाच्या सल्ल्याने देऊ शकतो परंतु असे करणे धोकादायक असते त्यामुळे शक्यतो पोटॅशियम हे तोंडावाटे पाजावे.

· जनावरांना पोटॅशियमची खूप जास्त कमतरता असेल तरच पशुवैद्यका शिरेतून पोटॅशियम देतात.