Ahilyanagar News : शेतकऱ्यांना पशुसंवर्धन विभागाकडून दिल्या जाणाऱ्या विविध वैयक्तिक लाभाच्या योजनांचा लाभ घेण्यासाठी ऑनलाइन मागणी अर्ज भरण्याला सुरुवात झाली आहे. अर्ज भरण्यापासून ते पात्रता यादी जाहीर करण्यासाठीचे दोन महिन्यांचे वेळापत्रक पशुसंवर्धन विभागाने जाहीर केले आहे. अर्ज भरण्यासाठी एकूण तीस दिवसांचा अवधी देण्यात आला आहे.

शेतकऱ्यांनी शेतीला जोड व्यवसाय म्हणून पूरक व्यवसाय करण्यासाठी नावीन्यपूर्ण व जिल्हास्तरीय योजनांतून दुधाळ गाई-म्हशी, शेळी-मेंढी, एक हजार मांसल कुक्कुटपक्षी संगोपन निवारा शेड उभारणीला अर्थसाह्य, १०० कुक्कुट पिलांचे वाटप, पंचेवीस अधिक तीन तलंगा गट वाटप यासारख्या वैयक्तिक योजनांचा लाभ दिला जातो.

अलीकडे काही वर्षांपासून या योजनांना राज्यात शेतकऱ्यांचा मोठा प्रतिसाद मिळत आहे. शेतकऱ्यांचा वेळ आणि आर्थिक बचतीसाठी सात वर्षांपासून पशुसंवर्धन विभागाकडून ऑनलाइन अर्ज स्वीकारले जात आहेत. यंदासाठी ३ मेपासून अर्ज भरण्याला सुरुवात झाली असून २ जुलैला अंतिम पात्रता यादी प्रसिद्ध होणार आहे.

अर्ज भरण्यापासून पात्रता यादी निश्‍चित करण्याबाबत दोन महिन्यांचे वेळापत्रक निश्‍चित केले आहे. संगणकप्रणालीत अर्ज भरणे अत्यंत सुलभ करण्यात आले असून अर्ज भरताना आता कमीत कमी टाइप करावे लागणार आहे. शेतकऱ्यांना मोबाइलमध्येही सहजपणे अर्ज भरता येईल. https://ah.mahabms.com या संकेतस्थळावरून किंवा AH-MAHABMS हे मोबाइल अॅप डाउनलोड करून शेतकऱ्यांना सहज अर्ज करता येणार आहे. लाभ मिळेपर्यंत एकदा केलेला अर्ज पुढील पाच वर्षांसाठी ग्राह्य असून प्रतीक्षा यादी तयार केली जात आहे. मागील प्रतीक्षा यादी राज्यातील बहुतांश जिल्ह्यात संपली असल्याचे सांगितले जात आहे.

...असे आहे वेळापत्रक

- अर्ज भरणे ः ३ मे ते २ जून

- रॅडमायझेशन पद्धतीने प्राथमिक लाभार्थी निवड ः ३ ते ७ जून

- मागील व या वर्षीच्या लाभार्थ्यामार्फत कागदपत्रे अपलोड करणे ः ८ ते १५ जून

- पशुसंवर्धन अधिकाऱ्यांमार्फत कागदपत्रे पडताळणी ः १६ ते २४ जून

- कागदपत्राची त्रुटी पूर्ण करणे ः २५ ते २७ जून

- कागदपत्रे अंतिम पडताळणी ः २८ ते ३० जून

- अंतिम पात्र लाभार्थी यादी ः २ जुलै