सांगली ः जिल्ह्यात रोज १० ते १५ जनावरांना लम्पी स्कीन आजाराचा प्रादुर्भाव (Lumpy Infection To Animal) प्रादुर्भाव होत असल्याचे चित्र आहे. आतापर्यंत १५३ जनावरांना या आजाराची लागण (Lumpy Skin Vaccination) झाली असून आतापर्यंत चार जनावरांचा मृत्यू (Animal Death lumpy Skin) झाला आहे. तर २० जनावरे या आजारातून बरी झाली आहेत.

जिल्ह्यातील वाळवा तालुक्यातून लम्पी आजाराचा प्रादुर्भाव सुरू झाला. वाळवा तालुक्यात ९० जनावरांना आजाराची लागण झाली असून त्यापाठोपाठ मिरज तालुक्यातील जनावरे बाधित झाली आहेत. जिल्ह्यातील पशुसंवर्धन विभागाकडून या आजाराचा प्रादुर्भाव रोखण्यासाठी प्रयत्न सुरू आहेत.

परंतु प्रादुर्भाव झपाट्याने वाढत आहे. जिल्हा पशुसंवर्धन विभाग आणि दूध संघाच्या माध्यमातून लसीकरण सुरू करण्यात आले आहे. जिल्ह्यात सर्वच जनावरांना लसीकरण मोहीमदेखील सुरू केली आहे. शुक्रवारअखेर (ता. २३) ७१ हजार २१२ जनावरांना लसीकरण करण्यात आले आहे.

जिल्ह्यातील मिरज तालुक्यात १ तर पलूस तालुक्यात २ आणि वाळवा तालुक्यातील १ अशी एकूण चार जनावरे या आजारामुळे दगावली आहेत. शिराळा आणि तासगाव तालुक्यात लम्पी स्कीन आजाराचा प्रादुर्भाव झाला नाही. त्यामुळे या दोन्ही तालुक्यांत आजाराचे नियंत्रण करण्यात पशुसंवर्धन विभागाला यश आले असल्याचे दिसते आहे.

आटपाडी तालुक्यात ३, जत तालुक्यात ७, कडेगाव तालुक्यात १, कवठे महांकाळ तालुक्यात ३, खानापूर तालुक्यात ५, मिरजमध्ये ३०, पलूस तालुक्यात १४ आणि वाळवा तालुक्यात ९० जनावरांना लम्पी स्कीनची लागण झाली आहे. लम्पी स्कीनची लस उपलब्ध करण्यासाठी शासनाकडे सातत्याने पाठपुरावा सुरू आहे. जिल्ह्यात १ लाख ६३ हजार १०० लसी उपलब्ध आहेत.