अॅग्रोवन वृत्तसेवा
सोलापूर ः जिल्ह्यातील जवळपास नऊ तालुक्यांत ‘लम्पी स्कीन’चा (Lumpy Skin) प्रादुर्भाव झाला आहे. अगदी अल्पावधीतच या आजाराने जिल्हा व्यापला आहे. पशुसंवर्धन विभागाने बाधित क्षेत्र आणि बाधित क्षेत्राबाहेरील अशा एकूण तीन लाख ३६ हजार ७८ जनावरांचे लसीकरण (Vaccination) केले आहे. पण तरीही त्यातून आतापर्यंत १२ जनावरे या आजाराने दगावली आहेत.

माळशिरस, सांगोला, पंढरपूर, करमाळा, उत्तर सोलापूर, माढा या दुग्ध व्यवसाय असणाऱ्या भागांत लम्पी स्कीनची व्याप्ती वाढली आहे. जिल्ह्यात एकूण पशुधन ७ लाख ४५ हजार ४०४ इतके आहे. आतापर्यंत जिल्ह्यातील नऊ तालुक्यांतील ४२ गावांतील ३०० जनावरांना लम्पी स्कीनचा प्रादुर्भाव   झाला आहे. त्यातून आतापर्यंत माळशिरसमध्ये दोन बैल, सांगोल्यात दोन गाई, पंढरपुरात एक गाय, माढ्यात एक बैल, करमाळ्यात दोन गाय, उत्तर सोलापुरात एक गाय, तीन बैल अशी चार जनावरे दगावली.

बाधित क्षेत्रातील गायवर्ग जनावरे साधारण १ लाख ७८ हजार ७३२ आहेत. त्यापैकी एकूण बाधित क्षेत्रातील एक लाख ४५ हजार ६२६ जनावरांचे (८१ टक्के) लसीकरण झाले. एकूण बाधित क्षेत्र सोडून एक लाख ९० हजार ४५२ जनावरांचे लसीकरण पूर्ण झाले आहे. आतापर्यंत एकूण बरी झालेली जनावरे ८२ इतकी आहेत. तर सध्या उपचाराधीन जनावरे जवळपास २०६ आहेत. त्यात तीन जनावरे गंभीर आहेत.