Akola News : गेल्या वर्षात राज्यात सर्वाधिक वेगाने अकोला जिल्ह्यात लम्पी स्कीन हा रोग जनावरांमध्ये प्रसारीत झाला होता. यंदा मात्र आतापर्यंत एकही जनावर बाधित झालेले नसल्याची माहिती जिल्हा पशुसंवर्धन विभागाकडून देण्यात आली.

मागील वर्षी जुलै-ऑगस्ट दरम्यान अकोला जिल्ह्यात गावागावांत जनावरे लम्पी स्कीनने बाधित झाली होती. काही जनावरांचा मृत्यूसुद्धा या रोगामुळे ओढावला होता. तेव्हा पशुसंवर्धन विभागाचे मंत्री, सचिव व वरिष्ठ अधिकारी अकोला जिल्ह्यावर लक्ष ठेवून होते. शासनाने लम्पीसाठी लसीकरणाची मोहीम राबवल्याने साथीवर नियंत्रण आले. अद्याप जनावरांमध्ये लम्पीचा प्रादुर्भाव कुठेही झाला नसल्याची माहिती आहे.

जिल्ह्यात दोन लाख ३३ हजारांवर जनावरे असून त्यांच्या लसीकरणासाठी आतापर्यंत ९३३०० लसी उपलब्ध झालेल्या आहेत. त्यापैकी ४४ हजार जनावरांचे लसीकरण पूर्ण झाल्याची माहिती जिल्हा पशुसंवर्धन अधिकारी डॉ. दळवी यांनी दिली. लसीकरणाची मोहीम राबवली जात असून वरिष्ठांकडून त्या-त्या प्रमाणात लसींचा पुरवठा केला जात आहे.

लम्पी आजारावर थेट काम करणारी लस अद्यापही आलेली नाही. गेल्या वर्षी गोट फॉक्स या लसीच्या साह्यानेच प्रादुर्भाव नियंत्रणासाठी प्रयत्न झाले. त्यात बहुतांश यशही आले होते. यंदा लम्पी स्कीनवरील स्वतंत्र लस मिळेल अशी अपेक्षा पशुपालकांना लागलेली होती. मात्र, अद्याप ही लस आलेली नसल्याने यंदाही गोट फॉक्स याच लसीचा आधार यंत्रणेला व पर्यायाने जनावरांना आहे.

आकडेवारी

मिळालेल्या लसी ९३३००

झालेले लसीकरण ४४०२४

एकूण जनावरे २३३२७१