Nagar News : नगरपी’मुळे नगर जिल्ह्यात चार हजार ३५९ जनावरांचा यंदा मृत्यू झाला. दुग्धविकासमंत्री राधाकृष्ण विखे पाटील यांच्या पुढाकारामुळे जिल्ह्यातील लम्पी (lumpy Skin) मृत्यू पावलेल्या जनावरांपैकी ३ हजार ९८४ जनावरांच्या पशुपालकांना प्रकरणे मंजूर होऊन ११ कोटी रुपयांची मदत मिळाली आहे. उर्वरित पशुपालकांनाही लवकरच मदत (Compensation) मिळणार आहे.

नगर जिल्ह्यात यंदा शेतकऱ्यांना लम्पीने त्रस्त केले. आजाराची व्याप्ती वाढती असल्याने पशुपालक हैराण झाला होता. दुधाळ जनावरांनाच लम्पी स्कीन रोगाने घेरल्याने दूध उत्पादकांचे मोठे नुकसान झाले होते. दूध उत्पादनावरही परिणाम झाला. लम्पीच्या बाधेने नगर जिल्ह्यात तब्बल ४ हजार ३५९ जनावरे दगावली.

त्यामुळे शेतकऱ्यांचे मोठे आर्थिक नुकसान झाले. महसूलमंत्री व दुग्धविकासमंत्री राधाकृष्ण विखे पाटील यांच्या पुढाकाराने लम्पीने मृत्यू झालेल्या जनावरांच्या पशुपालकांना आर्थिक मदत सरकारने दिली, अशी मदत देणारे महाराष्ट्र हे एकमेव राज्य असल्याचे सांगण्यात आले. नगर जिल्ह्यात नुकसान भरपाईपोटी मार्चअखेर ११ कोटी रुपये शेतकऱ्यांच्या बँक खात्यांवर वर्ग केले.

दोन दिवसांत ही रक्कम त्यांना मिळू शकेल. नगर जिल्ह्यात गेल्या वर्षी २०२२मध्ये जिल्ह्यात लम्पीने थैमान घातले होते. राज्यात इतर जिल्ह्यात हा आजार आटोक्यात आलेला असताना नगर जिल्ह्यात त्याने सरकारी यंत्रणा, तसेच शेतकऱ्यांना त्रस्त करून सोडले होते. प्रशासनाने स्वच्छ गोठ्यासारखे उपक्रम राबवले. तब्बल १४ ते १५ लाख जनावरांना प्रतिबंधात्मक लस दिली. त्यामुळे साथ आटोक्यात येण्यास मदत झाली.

२२ जणांनी नाकारली भरपाई

राज्य सरकारने शेतकऱ्यांना आर्थिक मदत देऊन हातभार लावण्याचा प्रयत्न केला. मार्चअखेर सुमारे चार हजार प्रकरणांत शेतकऱ्यांना नुकसान भरपाई देण्यात आली. मात्र जिल्ह्यातील २२ शेतकऱ्यांनी भरपाई घेण्यास नकार दिला.

आम्ही हौसेने जनावरे पाळली होती. त्यांना आम्ही कुटुंबातील सदस्य समजले. त्यासाठी भरपाई घेण्याची आमची मानसिकता नसल्याचे त्यांनी पशुसंवर्धन विभागाला लेखी दिले.