Latur News : एक सप्टेंबरपासून होणाऱ्या २१ व्या पशुगणनेच्या यशस्वीतेसाठी पशुपालकांचे सहकार्य महत्त्वाचे आहे. प्रत्येक पशुपालकाने आपल्याकडील सर्व प्रकारच्या पशुधनाची अचूक माहिती प्रगणकांना पुरवावी, असे आवाहन पशुसंवर्धन विभागाचे प्रादेशिक सहआयुक्त डॉ. नाना सोनवणे यांनी केले.

पशुगणनेच्या तयारीसाठी येथे आयोजित प्रशिक्षण कार्यक्रमात ते बोलत होते. जिल्हा पशुसंवर्धन उपायुक्त डॉ. नानासाहेब कदम, जिल्हा पशुसंवर्धन अधिकारी डॉ. श्रीधर शिंदे यांची या वेळी प्रमुख उपस्थिती होती. डॉ. सोनवणे म्हणाले, की पशुपालकांनी ही माहिती केवळ पशुसंवर्धन विभागासाठीच नाही, तर संपूर्ण ग्रामीण विकासासाठी आणि योजनांच्या अंमलबजावणीसाठी महत्त्वपूर्ण ठरणार आहे.

त्यामुळे पशुपालकांनी प्रगणकांना योग्य माहिती देऊन या राष्ट्रीय कार्यात आपले योगदान द्यावे. डॉ. कदम पशुगणना प्रक्रियेसाठी मास्टर ट्रेनर असून त्यांनी पशुगणनेचे प्रशिक्षण दिल्ली येथे घेतले आहे. त्यांच्या अनुभवाच्या आधारे त्यांनी मार्गदर्शन केले. पशुगणना एक सप्टेंबरपासून सुरू होणार असून ती ३१ डिसेंबरपर्यंत पूर्ण करणे आवश्यक आहे.

या गणनेत ग्रामीण आणि शहरी भागातील प्रत्येक कुटुंबातील सर्व प्रकारच्या पशुधनाची संख्या नोंदविणे आवश्यक आहे. गणनेच्या प्रक्रियेत अचूकता आणि पारदर्शकता राखण्यासाठी विशेष ऑनलाइन प्रणालीचा मोबाइल ॲपद्वारे वापर करण्यात येणार असल्याचे डॉ. शिंदे यांनी सांगितले.

सहायक आयुक्त डॉ. सत्यविजय जाधव, डॉ. वीणा गर्जे, डॉ. अमर सोमवंशी व डॉ. योगेश बायस यांनीही विविध विषयावर मार्गदर्शन केले. अधिकारी, कर्मचारी, प्रगणक व पर्यवेक्षक उपस्थित होते.