नांदेड : जिल्ह्यात लम्पी स्कीन (lumpy Skin Disease) प्रादुर्भाव मोठ्या प्रमाणात वाढत आहे. आजपर्यंत एकूण २१२ बाधित गावात तीन हजार ३३१ गाय वर्ग पशुधनाला (Livestock Infection) या आजाराची बाधा झाली आहे. तर १६७ जनावरांचा मृत्यू झाला आहे. तर दोन हजार १८३ जनावरे बरे झाल्याची माहिती जिल्हा पशुसंवर्धन (Animal Husbandry) उपायुक्त डॉ. मधुसूदन रत्नपारखी यांनी दिली.

जिल्ह्यात गाय वर्ग पशुधनाला लम्पी स्कीन आजाराची बाधा होत आहे. या आजाराचा फैलाव दररोज होत असल्याने जनावरांचे मृत्यूचे प्रमाणही वाढत आहे. आजपर्यंत २१२ बाधित गावांत तीन हजार ३३१ गाय वर्ग पशुधनाला या आजाराची बाधा झाली आहे. तर १६७ जनावरांचा मृत्यू झाला आहे. तर दोन हजार १८३ जनावरे बरे झाले आहेत.

गाय वर्ग पशुधनातील लम्पी आजाराचा अधिक फैलाव होऊ नये यासाठी जिल्हा प्रशासनातर्फे व्यापक लसीकरणासह जनावरांच्या स्वच्छतेबाबत जनजागृती केली जात आहे. लम्पीची बाधा झालेल्या ९८७ जनावरांवर औषधोपचार चालू आहे. सद्यःस्थितीत लसीकरण मोठ्या प्रमाणात केले जात आहे.

आजपर्यंत चार लाख २४ हजार १२७ प्रागतिक लसीकरण पूर्ण झाले आहे. मृत पशुधनाच्या लाभार्थ्यांची संख्या ७४ वर पोहचली आहे. जिल्ह्यात पुरेशा प्रमाणात उपलब्ध लसमात्रा असून, पशुपालकांनी लसीकरणासाठी पुढाकार घ्यावा, असे आवाहन डॉ. रत्नपारखी यांनी केले.