Nashik News: यशवंतराव चव्हाण महाराष्ट्र मुक्त विद्यापीठास पर्यावरण संवर्धन क्षेत्रातील शाश्वत व मूलभूत योगदानाबद्दल ‘अर्थ डे डॉट ओआरजी’या आंतरराष्ट्रीय संघटनेशी संलग्नित ‘अर्थ डे नेटवर्क’(आशिया) तर्फे जागतिक निसर्ग संवर्धन दिनानिमित्त सोमवारी (ता.२८) द्वितीय क्रमांकांच्या ‘स्टार कॅम्पस अॅवॉर्ड ने सन्मानित करण्यात आले.

विद्यापीठात जागतिक निसर्ग संवर्धन दिनानिमित्त आयोजित कार्यक्रमात संघटनेचे प्रतिनिधी विनायक साळुंखे यांच्याकडून विद्यापीठाचे कुलगुरू प्रा. संजीव सोनवणे यांनी हा पुरस्कार स्वीकारला.या वेळी व्यासपीठावर पद्मश्री विजेते चैत्राम पवार, विद्यापीठाचे प्र-कुलगुरू डॉ. जोगेंद्रसिंह बिसेन, डॉ.संजीवनी महाले,राष्ट्रीय विद्यार्थी पर्यावरण स्पर्धेचे डॉ.राहुल मुंगीकर,डॉ.चेतना कामळस्कर,गोपाळ पाटील यांची विशेष उपस्थिती होती.‘

अर्थ डे नेटवर्क’ (आशिया) तर्फे देशातील शैक्षणिक संस्थासाठी जागतिक वसुंधरा दिनानिमित्त २२ एप्रिल २०२५ रोजी ‘आपली शक्ती-आपला ग्रह’ या संकल्पनेवर आधारित पर्यावरण पूरक कार्य स्पर्धा घेण्यात आली होती. त्यात यशवंतराव चव्हाण महाराष्ट्र मुक्त विद्यापीठाची द्वितीय क्रमांकाच्या ‘स्टार कॅम्पस अवार्ड’ साठी निवड करण्यात आली. 

...या कार्यामुळे झाला गौरव

संस्थेने विद्यापीठाचा दीडशे एकरवरील वैविध्यपूर्ण वृक्ष संपदा व हरित परिसर,जवळपास साडेतीनशे सौर पॅनेलचा वापर सुरू करून केलेली वीज बचत व वीज बिलातील कपात, कमी कार्बन उत्सर्जन व अक्षय ऊर्जा स्त्रोतांचा वाढीव वापर,पावसाचे पाणी साठवणूक व्यवस्था, मधुमक्षिका पालन, वनशेती, स्वच्छता आदी मुद्दे प्राधान्याने अधोरेखित करत विद्यापीठाचा गौरव केला आहे.यामुळे विद्यापीठाच्या शिरपेचात आणखी एक मानाचा तुरा रोवला गेला आहे.