Parbhani News : मुख्यमंत्री शाश्‍वत कृषी सिंचन योजनांतर्गत सोमवार (ता. ८) पर्यंत परभणी जिल्ह्यात १०४ व हिंगोली जिल्ह्यात ४७ शेततळ्यांची कामे पूर्ण झाली आहेत. त्याबद्दल परभणी जिल्ह्यात ६८ लाख ७१ हजार रुपये, तर हिंगोली जिल्ह्यात २८ लाख ३५ हजार रुपये अनुदान वाटप करण्यात आले आहे.

मुख्यमंत्री शाश्‍वत कृषी सिंचन योजनांतर्गत परभणी जिल्ह्यात ४२० वैयक्तिक शेततळ्याचे उद्दिष्ट आहे. या योजनेच्या लाभासाठी सोडतीसाठी ३ हजार ८४१ शेतकऱ्यांच्या अर्जाची निवड करण्यात आली होती. त्यापैकी ५५ अर्ज नाकारण्यात आले, तर ३ हजार २२८ अर्ज रद्द करण्यात आले. ५५८ अर्ज प्रक्रियेत आहेत.

शेततळे पूर्ण केलेल्या ११० शेतकऱ्यांना अनुदान वितरणास मंजुरी देण्यात आली त्यापैकी १०४ लाभार्थींना ६८ लाख ८१ हजार रुपये अनुदान वितरित करण्यात आले. हिंगोली जिल्ह्यात २८० शेततळ्यांचे उद्दिष्ट आहे. सोडतीसाठी २ हजार ७७१ शेतकऱ्यांच्या अर्जाची निवड करण्यात आली. त्यापैकी ४९ अर्ज नाकारण्यात आले.

तर २ हजार ३८ अर्ज रद्द करण्यात आले. एकूण ६८४ अर्ज प्रक्रियेत आहेत. पूर्ण झालेल्या ४७ शेततळ्यांच्या लाभार्थ्यांना २८ लाख ३७ हजार रुपये अनुदान वितरित करण्यात आले. कृषी विभागामार्फत राज्यात नोव्हेंबर २०२२ पासून मुख्यमंत्री शाश्‍वत कृषी सिंचन योजना राबविली जात आहे. शेततळ्याच्या माध्यमातून पाणीसाठा निर्माण केल्यास पावसाच्या खंड काळात, खरीप पिके तसेच फळबागांच्या संरक्षित सिंचनासाठी पाणी उपलब्ध होते.

दुष्काळी स्थितीत शेततळ्यातील पाणी उपयोगी येते. या योजनेअंतर्गत ३० बाय ३० मीटर आकाराच्या शेततळ्याच्या खोदकामासाठी ७५ हजार रुपये, तर अस्तरीकरणासाठी ७५ हजार रुपये असे एकूण १ लाख ५० हजार रुपयांपर्यंत अनुदान आहे. जिल्हास्तरावर काम पूर्ण झाल्यानंतर १५ दिवसांच्या आत लाभार्थी शेतकऱ्यांच्या बँक खात्यावर अनुदानाची रक्कम जमा करण्यात येते.

यापूर्वी शेततळे योजनेचा लाभ न घेतलेल्या शेतकऱ्यांनी महाडीबीटी पोर्टलवर सीएससी केंद्रामार्फत किंवा वैयक्तिकरीत्या ऑनलाइन नोंद करून या योजनेचा लाभ घ्यावा अधिक माहितीसाठी संबंधित कृषी सहायक, तालुका कृषी अधिकारी यांच्याशी संपर्क करावा, असे आवाहन कृषी विभागातर्फे करण्यात आले आहे.