Cashew Rate : काजू दराचा वाद संपुष्टात, शासनाकडून काजूला १० रुपये अनुदान, बैठकीत महत्वपूर्ण निर्णय

Cashew Rate Sindhudurg : सिंधुदुर्ग जिल्ह्यात मागच्या काही दिवसांपासून काजू दरावरून जोरदार वाद सुरू होता. दरम्यान यावर काल महत्वपूर्ण बैठक पार पडली. काजू दरावरून निर्माण झालेला वाद अखेर संपुष्टात आला आहे. काजूला शासन दहा रुपये अनुदानासह १३० रुपये दर येणार आहे.

याबाबतचा तसा निर्णय आज शालेय शिक्षणमंत्री दीपक केसरकर व जिल्हा बँक अध्यक्ष मनीष दळवी यांच्या उपस्थितीत शेतकरी व कारखानदार यांच्या बैठकीत झाला. यावर्षीसाठी या दराशी समाधानी असल्याचे सिंधुदुर्ग शेतकरी फळबागायतदार संघाचे अध्यक्ष विलास सावंत यांनी सांगितले.

शासनाचे दहा रुपये अनुदान आचारसंहितेनंतर देण्यात येणार असल्याचे मंत्री केसरकर यांनी स्पष्ट केले. जिल्ह्यातील काजू बीला स्वामीनाथन आयोगाच्या धर्तीवर १९७ रुपये दर मिळावा, या मागणीवर सिंधुदुर्ग शेतकरी व फळबागातदार ठाम होते; मात्र याबाबत काहीच तडजोड होत नसल्याने शेतकरी नाराज होते. त्यांनी आक्रमक भूमिका हाती घेतली होती. हा तिढा सोडवण्यासाठी केसरकर यांनी पुढाकार घेतला.

शासनाकडूनही काजू बीला दहा रुपये दरामागे अनुदान देण्याचे जाहीर केले; मात्र, ठोस निर्णय झाला नव्हता. त्यामुळे संघामध्ये नाराजी कायम होती. या पार्श्वभूमीवर शेतकरी व फळबागायतदार संघ व कारखानदार यांची बैठक केसरकर यांनी बोलावली.

यात काजू बागायतदारांची नाराजी दूर करत त्यांना शासनाचे अनुदान पकडून १३० रुपये दर देण्याचे निश्चित करण्यात आले. या संदर्भात केसरकर म्हणाले, "जिल्ह्यातील कारखानदारांकडून शेतकऱ्यांची काजू बी खरेदी करताना बाजारपेठेत ११० रुपये दर असलेला काजू ११५ रुपये तर ११५ रुपये दर असलेला काजू १२० रुपये दराने विकत घेण्याचे मान्य केले. या दरामागे शासनाकडून मिळण्यात येणारे दहा रुपयाचे अनुदानही देण्यात येणार आहे.