Washim News : जिल्ह्यात मागील दोन हंगामापासून मोठ्या क्षेत्रावर घेतल्या जात असलेल्या चियासीड या पिकाची महती थेट मुख्यमंत्री देवेंद्र फडणवीस यांच्यापर्यंतही पोचली. शेतकऱ्यांच्या कष्टाचे प्रतीक ठरलेल्या ‘वाशीम शेती शिल्प’ या स्थानिक कृषी ब्रँडखाली उत्पादित चिया बियाण्यांचा नमुना जिल्हाधिकारी बुवनेश्‍वरी एस. यांनी मुख्यमंत्री फडणवीस यांना भेट स्वरूपात सादर केला. मुख्यमंत्र्यांनी शेतकऱ्यांचे या वेळी कौतुक केले.

राज्यातील स्थानिक उत्पादनांना व्यापक बाजारपेठ मिळवून देण्यासाठी शासन कटिबद्ध आहे. अशा संकल्पनांना आवश्यक ती सर्वतोपरी मदत केली जाईल, असे आश्‍वासनही त्यांनी या वेळी दिले. जिल्हाधिकारी बुवनेश्‍वरी एस. यांनी पुढाकार घेत जिल्ह्यात हे पीक रुजवण्यात मोलाचा वाटा उचलला आहे. याला शेतकऱ्यांचा प्रतिसाद मिळतो आहे.

स्थानिक उत्पादनांना नवी बाजारपेठ मिळवून देण्याच्या दृष्टीने हा एक महत्त्वाचा टप्पा मानला जात आहे. वाशीम जिल्हा कृषिप्रधान असून, येथे उत्पादित होणारा शेतीमाल हा दर्जेदार आणि वैशिष्ट्यपूर्ण आहे.

या शेतीमालाला एकात्मिक ओळख देण्यासाठी ‘वाशीम शेती शिल्प’ हा ब्रॅण्ड विकसित करण्यात आला आहे. चिया बियाणे हे या ब्रॅण्डअंतर्गत उत्पादित पहिले महत्त्वाचे उत्पादन असून, यामध्ये भरपूर पोषणमूल्य असल्याने बाजारात चांगली मागणी आहे.

जिल्हाधिकारी बुवनेश्‍वरी यांनी सांगितले, की शेतकऱ्यांचे उत्पन्न वाढविण्यासाठी फक्त उत्पादन नव्हे, तर योग्य ब्रॅण्डिंग व मार्केटिंग गरजेचे आहे. ‘वाशीम शेती शिल्प’ हे याचे उत्तम उदाहरण ठरेल.