Sangli Kharif Season News : सांगली जिल्ह्यात खरीप हंगामातील पिकांच्या पेरणीसाठी शेतकरी सज्ज झाला आहे. सध्या वाळवा आणि पलूस तालुक्यांतील शेतकरी त्यांच्या उपलब्ध पाण्यावर आगाप सोयाबीनचा पेरणा करण्यासाठी नियोजन करू लागला आहे. परंतु पेरणीसाठी अद्याप गती नसून शेतकरी पेरणीसाठी मॉन्सूनपूर्व पावसाची प्रतीक्षा करू लागला आहे.

जिल्ह्यात यंदाच्या खरीप हंगामाचे सरासरी क्षेत्र ३ लाख ५६ हजार हेक्टर इतके क्षेत्र आहे. गतवर्षी खरीप हंगामातील पिकांची पेरणी २ लाख ५५ हजार ५१८ हेक्टरवर पेरा झाला होता.

यामध्ये सर्वाधिक सोयाबीनची पेरणी झाली होती. यंदाच्या हंगामात शेतकऱ्यांनी पेरणीपुर्व मशागती उरकल्या आहेत. पेरणीचे नियोजन करू लागला आहे. त्यानुसार बियाणे खरेदीसाठी शेतकरी पुढे येत आहे.

वास्तविक, वाळवा आणि पलूस तालुक्यांत आगाप सोयाबीन पेरणी केली जाते. कृष्णा नदीच्या काठावर वसलेले हे दोन्ही तालुके आहेत. त्यामुळे पाण्याची उपलब्धता असल्याने शेतकरी आगाप सोयाबीन पेरणीचे नियोजन करत असतो.

यंदाच्या हंगामात सोयाबीन पेरणीचे नियोजन केले असून टोकणी आणि पेरणीची कामे हाती घेतली आहेत. शिराळा तालुक्यात धूळ वाफेवर भाताची पेरणी सुरू झाली आहे.

मिरज, तासगाव, आटपाडी, जत, कवठे महांकाळ तालुक्यात शेतकरी शेतीची मशागत करू लागला आहे. येत्या आठ ते पंधरा दिवसांत या दुष्काळी पट्ट्यात शेतकरी पेरणी करण्यासाठी पुढे येतील, असे चित्र आहे.

वेळेत पाऊस न झाल्यास पेरणी लांबणीवर पडणार

जिल्ह्यात यंदा वळीव पावसाने दडी मारली आहे. पेरणीसाठी जरी शेतकरी पुढे आला असला तरी पेरणीला फारशी गती नाही. शेतकरी मॉन्सूनपूर्व पावसाची प्रतीक्षा करू लागला आहे. वेळेत पाऊस न झाल्यास पेरणी लांबणीवर पडेल, असा अंदाज शेतकऱ्यांमधून व्यक्त होत आहे.